Հայաստանը կաջակցի Նիգերիային Իրանից իր քաղաքացիների անվտանգ անցման հարցում
Նիգերիայի Դաշնային Կառավարության և Հայաստանի Հանրապետության կառավարության միջև համաձայնություն է ձեռք բերվել Իրանի Իսլամական Հանրապետությունից Նիգերիայի քաղաքացիներին Երևանով անվտանգ տարհանման վերաբերյալ, հայտնում է Նիգերիայի ԱԳՆ-ն:
Համաձայնությունը ձեռք է բերվել Իրանում Նիգերիայի դեսպանատան գործերի ժամանակավոր հավատարմատար Աբդուլռաշիդ Օմար Լավալի և ՀՀ ԱԳՆ-ի Միջին Արևելքի և Աֆրիկայի վարչության պետ Լևոն Պետրոսյանի հանդիպման ժամանակ, որտեղ բարձրացվել է Իրանում մնացած նիգերիացիների հարցը:
« Հայաստանի այս քայլը ընդգծում է միջազգային համերաշխության և մարդասիրական համագործակցության կարևորությունը ճգնաժամի ժամանակ, և Նիգերիան խորապես գնահատում է Հայաստանի պատրաստակամությունը՝ օգնելու ծանր իրավիճակում հայտնված Նիգերիայի քաղաքացիներին:
Նիգերիան կարևորում է Հայաստանի հետ ամուր դիվանագիտական հարաբերությունները և ակնկալում է երկկողմ կապերի հետագա ամրապնդում»,– ասվում է հայտարարության մեջ։
