Իրան-Իսրայել առճակատման ֆոնին Թուրքիան պատրաստ է ցանկացած սցենարի
Թուրքական մերձիշխանական «Yeni Şafak» կայքում հրապարակվել է «Թուրքիան պատրաստ է ցանկացած սցենարի» վերնագրով հոդված։ Մասնավորապես նշվում է, որ Իսրայելի «հարձակողականությունը» հող է պատրաստում տարածաշրջանում պատերազմի ալիքի համար։ Հունիսի 13-ից սկսված Իսրայել-Իրան հակամարտությունը որակվել է որպես քառօրյա պատերազմ։ Այս մասին հայտնում է ermenihaber.am-ը։
Նշվում է, որ Իսրայելի և Իրանի միջև առճակատման խորացման դեպքում կուժեղացվի փոխադարձ դիվանագիտությունը։ Զարգացումները կարտացոլվեն աշխարհում և հարակից տարածաշրջաններում։ Ընդգծվել է, որ Թուրքիայի անվտանգությունը վտանգի տակ դնող հնարավոր սցենարների դեմ նախապատրաստական աշխատանքները կարագացվեն։
«Մինչ ջանքեր են գործադրվում Իսրայելի ագրեսիան դիվանագիտական ճանապարհով զսպելու համար, վերլուծվում է նաև քառօրյա Իսրայել-Իրան պատերազմի հնարավոր ազդեցությունը համաշխարհային և տարածաշրջանային անվտանգության վրա»,- նշվել է հոդվածում:
Թուրքիան կարծում է, որ Իսրայելի հարձակումները չեն սահմանափակվում միայն Պաղեստինով և Իրանով, այլ դրանք դարձել են սպառնալիք, որն ամբողջ տարածաշրջանը ներքաշում է անկայունության մեջ:
«Այս զարգացումները, որոնք ազդում են նաև համաշխարհային անվտանգության վրա, մասնավորապես՝ էներգետիկ և առևտրային ուղիների վրա, մանրամասն քննարկվում են ազգային անվտանգության խորհրդի և համապատասխան նախարարությունների կողմից»-, ընդգծել է հոդվածի եղինակը:
Գնահատվող թեմաների շարքում են նաև Իսրայելի նպատակների ընդլայնման ազդեցությունն Իրանի դեմ, կամ անվտանգության հետ կապված խնդիրները, որոնք կառաջանան Իրանի կողմից Հորմուզի նեղուցը փակելու տարբերակի օգտագործման դեպքում։ Դրանց ազդեցությունը տնտեսության վրա ուսումնասիրվում է բազմաչափ ձևով։
Շեշտվել է, որ Թուրքիան որդեգրել է տարածաշրջանում հնարավոր նոր լարվածության սցենարներին պատրաստ լինելու սկզբունքը։ Մշակվել են համապարփակ ծրագրեր՝ մարդասիրական օգնության կարողությունները մեծացնելու և սահմանային անվտանգությունն ամրապնդելու համար:
