Թուրքիայում քամու էներգիայի հզորությունը ռեկորդային աճ է գրանցել

Թուրքիայի քամուց ստացվող էներգիայի ընդհանուր հզորությունը վերջին 10 տարվա ընթացքում աճել է 177%-ով՝ հասնելով 13․376 մեգավատի։ Այս մասին հայտնում է ermenihaber.am-ը։

Քամու առաջին էլեկտրակայանը գործարկվել է 1998 թվականին՝ Իզմիրի Չեշմե շրջանում։ Այժմ երկրում կան բազմաթիվ նման կայաններ։

Աճին նպաստել են տեխնոլոգիական առաջընթացը, վերականգնվող էներգիայի նկատմամբ աճող պահանջարկը և կառավարության խթանող քաղաքականությունը։

Թուրքիայի Էներգետիկ արդյունաբերողների և գործարարների միության ղեկավար Ալփեր Քալայջըն նշել է, որ վերջին 10 տարում տարեկան միջինում ավելացվել է շուրջ 1000 մեգավատ հզորություն։ 2035 թ․-ի համար սահմանված 38․1 գիգավատ նպատակին հասնելու համար, ըստ նրա, տարեկան միջին աճը պետք է հասցնել 2300 մեգավատի։

Քալայջըն նաև ընդգծել է, որ այս տեմպին հասնելու համար անհրաժեշտ է բարելավել էլեկտրական ցանցի ենթակառուցվածքները։