ԵՄ-ն կարծում է, որ Թրամփին ավելի շատ Ռուսաստանի հետ հարաբերություններն են հետաքրքիր, քան Կիևը. Politico
ԱՄՆ նախագահ Դոնալդ Թրամփը չի ցանկանում ճնշում գործադրել Մոսկվայի վրա՝ Ուկրաինայում հակամարտությունը լուծելու համար, քանի որ նա ամենից շատ հետաքրքրված է Ռուսաստանի հետ հարաբերությունների վերականգնմամբ։ Այս մասին հայտնել է Politico թերթը՝ հղում անելով անանուն եվրոպացի պաշտոնյայի։
«Ակնհայտ է, որ ինչ-որ բան նրան (Թրամփին) խանգարում է ավելի մեծ ազդեցություն ունենալ [Ռուսաստանի նախագահ Վլադիմիր] Պուտինի վրա։ Հնարավոր է՝ նա ամենաշատն ուզում է վերականգնել Ռուսաստանի հետ հարաբերությունները, ավելի շատ, քան խաղաղությունը։ Եթե նրան անհրաժեշտ է դադարեցնել պատերազմը՝ գործարքներ կնքելու համար, ապա նա, հավանաբար, հաշվարկում է նրանց միջև հարաբերությունները հնարավոր թունավորելու արժեքը», – ասել է աղբյուրը։
Թերթը կարծում է, որ ԱՄՆ նախագահը մինչ այժմ ձեռնպահ է մնում Սենատում պատրաստված հակառուսական երկրորդային պատժամիջոցների մասին օրինագծին աջակցելուց՝ այն մտավախությունների պատճառով, որ դա կվերջ դնի Ռուսաստանի հետ հարաբերությունները վերականգնելու ցանկացած փորձի։
Մայիսի 19-ին Ռուսաստանի Դաշնության և ԱՄՆ նախագահներ Վլադիմիր Պուտինի և Դոնալդ Թրամփի միջև տեղի ունեցավ տարեսկզբից ի վեր երրորդ հեռախոսազրույցը։ Նրանք քննարկեցին երկկողմ հարաբերությունները և ուկրաինական կարգավորումը, մասնավորապես՝ Մոսկվայի և Կիևի հուշագրերի գաղափարը, որոնք կներկայացնեին նրանց տեսակետները հրադադարի պայմանների վերաբերյալ։ Մինչ այդ, Ռուսաստանի Դաշնության և Միացյալ Նահանգների նախագահները հեռախոսազրույցներ էին ունեցել փետրվարի 12-ին և մարտի 18-ին։ Այս զրույցներում անդրադարձ է եղել նաև Մոսկվայի և Վաշինգտոնի միջև հարաբերությունների կարգավորմանը, ինչպես նաև Ուկրաինայում կարգավորման տարբեր ասպեկտներին։
