Իսրայելական ուժերը Ջենին քաղաքում կրակ են բացել 25 արաբ և եվրոպացի դիվանագետների ուղղությամբ
Իսրայելական ուժերը կրակ են բացել 25 արաբ և եվրոպացի դեսպանների ու դիվանագետների ուղղությամբ, որոնք այցելել էին Արևմտյան ափին գտնվող Ջենինի փախստականների ճամբար։ Այս մասին հայտնում է Al Jazeera-ն։
Դիվանագիտական պատվիրակությունը մայիսի 21-ի առավոտյան այցելել է Ջենինի նահանգապետարան և քննարկել քաղաքում ու ճամբարում տիրող իրավիճակը։
Պաղեստինյան WAFA գործակալության տեղեկացմամբ՝ Պաղեստինի արտաքին գործերի և արտագաղթողների նախարարությունը դատապարտել է Պաղեստինի պետությունում հավատարմագրված դիվանագիտական պատվիրակությանը և նրանց ուղեկցող մի շարք արաբ և օտարերկրյա լրագրողների՝ իսրայելական ուժերի կողմից ուղիղ թիրախավորումը, երբ նրանք շրջագայություն էին կատարում Ջենինի նահանգում՝ ուսումնասիրելու մարդասիրական իրավիճակը, հանցագործություններն ու խախտումները։
Նախարարությունը հաստատել է, որ այս ագրեսիվ գործողությունը միջազգային իրավունքի և 1961 թվականի Վիեննայի կոնվենցիայով ամրագրված դիվանագիտական հարաբերությունների ամենահիմնական կանոնների կոպիտ և լուրջ խախտում է, և կոչ է արել միջազգային հանրությանը քայլեր ձեռնարկել՝ դադարեցնելու հանցագործությունները։
Իսրայելի բանակի ռադիոն, հղում անելով անվտանգության ծառայության աղբյուրին, նշել է, որ դիվանագիտական պատվիրակությունը հասել է Ջենինի ճամբարում գտնվող արգելված տարածք։
Arabi21 լրատվականի տեղեկացմամբ՝ դիվանագիտական պատվիրակության կազմում են եղել Եգիպտոսի, Հորդանանի, Մարոկկոյի, Եվրամիության, Պորտուգալիայի, Չինաստանի, Ավստրիայի, Բրազիլիայի, Բուլղարիայի, Թուրքիայի, Իսպանիայի, Լիտվայի, Լեհաստանի, Ռուսաստանի, Ճապոնիայի, Ռումինիայի, Մեքսիկայի, Շրի Լանկայի, Կանադայի, Հնդկաստանի, Չիլիի, Ֆրանսիայի, Մեծ Բրիտանիայի դեսպանները և մի շարք այլ երկրների ներկայացուցիչներ։
