Գազայի հատվածում իսրայելական հարձակումները շուրջ 40  մարդու կյանք են խլել

Իսրայելական ուժերը շարունակում են ռմբակոծությունների ենթարկել Գազայի տարբեր շրջաններ։ Բժշկական աղբյուրները հայտնել են, որ մայիսի 1-ին անկլավում զոհվել է 31 մարդ, իսկ մայիսի 2-ի լուսաբացից ի վեր՝ 9 մարդ։ Այս մասին հայտնում է Al Jazeera-ն։

Միևնույն ժամանակ, Արևմտյան ափին շարունակվում են Իսրայելի կողմից պաղեստինյան քաղաքների և գյուղերի վրա հարձակումները։Գազայի կառավարության լրատվական գրասենյակը հայտարարություն է տարածել՝ նշելով, որ մինչ աշխարհը տոնում է աշխատավորների միջազգային օրը, Գազայի հատվածում տիրող իրավիճակը հանգեցրել է գործազրկության մակարդակի աննախադեպ աճի՝ կազմելով 50%, ինչը Գազան դարձնում է աշխարհի ամենաբարձր գործազրկության մակարդակ ունեցող տարածաշրջաններից մեկը։

Գազայի հատվածի առողջապահության նախարարության գլխավոր տնօրեն Մունիր ալ-Բարշը հայտարարել է, որ անկլավի բնակչության 91%-ը տառապում է «սննդային ճգնաժամից»՝ Իսրայելի կողմից շարունակվող շրջափակման և մարտի 2-ից մարդասիրական օգնության մուտքի արգելքի պատճառով։

«Գազան ապրում է սարսափելի մարդասիրական ողբերգություն, որտեղ իշխում են  սովը, աղքատությունը և հիվանդությունները»,- նշել է նա։

Ալ-Բարշը կոչ է արել ՄԱԿ-ին «պաշտոնական հայտարարություն հրապարակել Գազայի հատվածում սովի մասին»՝ ընդգծելով, որ «բժշկական ու մարդասիրական տվյալները հաստատում են, որ դրա համար կան բավարար պայմաններ»։

Իսրայելը շարունակում է Գազայի հատվածում 2023 թ. հոկտեմբերի 7-ից մեկնարկած ռազմական գործողությունները։ Գազայի առողջապահության նախարարության տեղեկություններով՝ առնվազն 52 718 պաղեստինցի է զոհվել Գազայի դեմ Իսրայելի պատերազմի հետևանքով, վիրավորվել է շուրջ 118 091-ը:

Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։