Էրդողանն Անկարայում ընդունել է Սիրիայի անցումային շրջանի նախագահին
Թուրքիայի նախագահ Ռեջեփ Թայիփ Էրդողանը և Սիրիայի անցումային շրջանի նախագահ Ահմեդ աշ-Շարաան Անկարայում կայացած հանդիպումից հետո հանդես են եկել համատեղ մամուլի ասուլիսով։ Այս մասին հայտնում է թուրքական «Անադոլու» լրատվական գործակալությունը։
Էրդողանն իր ելույթում նշել է, որ Թուրքիան ամենահուսահատ ու դժվարին օրերին չի թողել սիրիացի ժողովրդին անախորժությունների մեջ, և Անկարան նոր ժամանակաշրջանում ևս նրանց կտրամադրի անհրաժեշտ աջակցությունը։
Նա նշել է, որ Սիրիայի անցումային շրջանի նախագահի այցն Անկարա դիտարկում է որպես մշտական բարեկամության շրջանի սկիզբ։ Էրդողանն ասել է, որ նախագահ Շարաայի հետ իրենց հանդիպումը տեղի է ունեցել անկեղծ մթնոլորտում։
Թուրքիայի նախագահն ընդգծել է, որ կողմերը գնահատել են համատեղ քայլերը, որոնք կարող են ձեռնարկվել Սիրիայում անվտանգության ու տնտեսական կայունության հաստատման համար, ինչպես նաև քննարկել են այլ քաղաքական լայն շրջանակ ընդգրկող հարցեր։
