Գերմանիայի կանցլերը հավանություն է տվել նավթի և գազի արտահանումը մեծացնելու Թրամփի ծրագրերին
Գերմանիայի կանցլեր Օլաֆ Շոլցը ողջունել է ԱՄՆ նախագահ Դոնալդ Թրամփի՝ նավթի և գազի արտահանումը խթանելու ծրագրերը՝ հայտարարելով, որ դա «լավ է Եվրոպայի և Գերմանիայի համար», գրում է գերմանական Handelsblatt թերթը։
Հարցազրույցում Շոլցն ասել է, որ այդ քայլը կօգնի կլիմայական չեզոքությանն անցնելու փուլում, որը կտևի մինչև այս դարի կեսը:
«Համաշխարհային շուկայում առաջարկի ավելացումը նշանակում է էներգակիրների գների իջեցում»,- ասել է կանցլերը։
Շոլցը գովաբանել է Թրամփին հեղուկ բնական գազի նոր տերմինալներ կառուցելու ցանկության համար, ինչը չի արել նրա նախորդ Ջո Բայդենը։ Շոլցն ասել է, որ ինքը միշտ դեմ է եղել ԱՄՆ-ում LNG տերմինալների ընդլայնման դադարեցմանը:
Միաժամանակ, Գերմանիայի կանցլերն ասել է, որ ափսոսում է Փարիզի կլիմայական համաձայնագրից դուրս գալու մասին Թրամփի անցած շաբաթ ընդունած հրամանագրի համար։ «Գլոբալ տաքացումը լուրջ վտանգ է ներկայացնում»,- ասել է Շոլցը՝ հավելելով, որ Գերմանիան կլիմայական քաղաքականության ոլորտում կշարունակի պահպանել իր դիրքորոշումը։
