Եվրահանձնաժողովը մետապնևմովիրուսի համաճարակի վտանգ չի տեսնում Եվրոպայում
Եվրամիությունը դեռևս չի տեսնում համաճարակի մասշտաբով մարդու մետապնևմովիրուսի (hMPV) տարածման վտանգ: Այս մասին հայտարարել է Եվրոպական հանձնաժողովի պաշտոնական ներկայացուցիչ Եվա Գրնցիրովան:
«Կարող եմ երաշխավորել, որ այս պահին չկա նոր համաճարակի պատրաստվելու անհրաժեշտություն», – չորեքշաբթի Բրյուսելում կայացած ճեպազրույցի ժամանակ նշել է խոսնակը՝ պատասխանելով Չինաստանում hMPV-ի բռնկման և ԵՄ երկրներում այդ հիվանդության առաջին դեպքերի գրանցման մասին հարցին:
Գրնցիրովան հավելել է, որ Հիվանդությունների կանխարգելման և վերահսկման եվրոպական կենտրոնը (ECDC) ուշադիր հետևում է իրավիճակին, որը քննարկվում է նաև Առողջապահության ոլորտում անվտանգության հանձնաժողովում: Խնդիրն ուշադրության կենտրոնում է մնալու առաջիկա շաբաթներին։
Չինաստանում hMPV-ի բռնկման մասին առաջին տեղեկությունները հայտնվել էին 2024 թվականի վերջին:
