Վրաստանում յուրաքանչյուր 5-րդ քաղաքացի նպաստառու է
Սոցիալական ծառայությունների գործակալության տվյալների համաձայն՝ 2024 թվականի դեկտեմբերի դրությամբ Վրաստանում կենսապահովման նպաստ ստացողների թիվը կազմում է 690.496։ Նրանցից 460.603-ը ստանում է միայն կենսապահովման նպաստ, իսկ 229.893-ը զբաղվածության խթանման պետական ծրագրում ընդգրկված անձինք են, որոնց 4 տարի երաշխավորված է սոցիալապես անապահովի կարգավիճակի պահպանումը։ Այս մասին գրում է aliq.ge-ն։
Ուշագրավ է, որ այս տվյալները 6,6 տոկոսով գերազանցում են 2023 թվականի դեկտեմբերի ցուցանիշը, երբ նպաստ է ստացել 647.535 մարդ, որից պետական ծրագրում ընդգրկվել է 207.542-ը։
2024 թվականի դեկտեմբերին նպաստ ստացողների թվում եղել է 0-18 տարիքային խմբի 270.712 անձ: Նրանցից 82.999 անչափահաս զբաղվածության խթանման պետական ծրագրում ընդգրկված անձի ընտանիքի անդամներ են։
2023 թվականի դեկտեմբերին նպաստ է ստացել 250.505 անչափահաս. նրանցից 75.053-ը եղել են զբաղվածության խթանման պետական ծրագրում ընդգրկված անձանց ընտանիքի անդամներ։ Ըստ այդ տվյալների՝ մեկ տարվա ընթացքում կենսապահովման նպաստ ստացող անչափահասների թիվն աճել է 8 տոկոսով։
Վրաստանի ազգային վիճակագրական ծառայության տվյալներով, այս պահին Վրաստանում ապրում է 3 մլն 694.600 մարդ։ Սոցիալական ծառայությունների գործակալության տվյալներով, կենսապահովման նպաստ ստացողների թիվը 690.496 է։ Ըստ այդ ցուցանիշների՝ Վրաստանում յուրաքանչյուր 5-րդը ապրուստի նպաստ է ստանում:
Ուշագրավ է, որ սոցիալական նպաստառուների թվի աճի ֆոնին, «Վրացական երազանք»-ը պետաշխատողների աշխատավարձը բարձրացնում է ընդամենը 10 տոկոսով, թոշակառուների թոշակն ընդամենը 35 լարիով, իսկ ահա միայն «Վրացական երազանք»-ով համալրված չլգիտիմացված խորհրդարանի պատգամավորների աշխատավարձը ավելանում է միջինը 7000 լարիով:
