ԵՄ-ն հայտարարել է, որ պատրաստ է Թրամփի սպառնալիքներին
Եվրամիությունը պատրաստված է ԱՄՆ նոր վարչակազմի կողմից մաքսատուրքերի հնարավոր բարձրացմանը, կարծում է Գերմանիայի կառավարության անդրատլանտյան հարաբերությունների համակարգող Թոբիաս Լինդները։ «Եթե Դոնալդ Թրամփը բարձր մաքսատուրքեր սահմանի Եվրամիության դեմ, ԵՄ-ն պատրաստ է դրան»,- ասել է Լինդները AFP-ին տված հարցազրույցում։ Ըստ նրա, Եվրամիությունը շատ մանրամասն կքննարկի համապատասխան հակաքայլերը, սակայն ներկա պահին մանրամասներ չի բացահայտի, տեղեկացնում է DW-ն։
Թրամփը ԵՄ գործընկերներին սպառնացել է «անծայրածիր մաքսատուրքերով», եթե նրանք չկրճատեն երկրի առևտրային դեֆիցիտը՝ նավթն ու գազն ԱՄՆ-ից գնելով: Ըստ Թոբիաս Լինդների, սա ցույց է տալիս, որ կլիմայի պաշտպանությունը և էներգետիկ անցման քաղաքականությունը «ի վերջո նույնպես կոշտ տնտեսական և առևտրային քաղաքականություն են»։
Ամերիկացի գործընկերների հետ բանակցություններում պետք է ցույց տալ, թե «որ ոլորտում է ԱՄՆ-ում հավելյալ արժեք ստեղծվում գերմանական ֆիրմաների կողմից, մասնավորապես ավտոմոբիլային ոլորտում», և ընդգծել, որ բազմաթիվ աշխատատեղեր դրանից են կախված, շեշտել է գերմանացի քաղաքական գործիչը։ «Ընկերությունները ոչ գերմանական, ոչ էլ ամերիկյան կոնցեռն են, դրանք և այն և մյուսն են», – ասել է նա:
Ինչ վերաբերում է Թրամփի դիվանագիտական կոպիտ ոճին, Լինդները խորհուրդ է տալիս նրա հետ շփվելիս հավասարակշռված մոտեցում ցուցաբերել։ Մի կողմից՝ Գերմանիան չպետք է փորձի հաճոյանալ ԱՄՆ նոր վարչակազմին՝ կատարելով նրա ցանկացած պահանջը։ Մյուս կողմից, պետք է հանգիստ վերաբերվել Վաշինգտոնի անբարեհաճ հայտարարություններին և սառնասրտորեն պատասխանել դրանց, նշել է տրանսատլանտյան համակարգողը։
