Թրամփի հայտարարությունները Պանամայի, Կանադայի, Գրենլանդիայի մասին կարող են ԱՄՆ դաշնակիցներին մղել ՌԴ և Չինաստան. Սենատոր
ԱՄՆ Սենատի արտաքին հարաբերությունների հանձնաժողովի հեռացող նախագահ Բեն Քարդինը ABC-ին տված հարցազրույցում ասել է, որ Պանամայի ջրանցքը գրավելու նորընտիր նախագահ Դոնալդ Թրամփի սպառնալիքները կարող են մղել Միացյալ Նահանգների դաշնակիցներին դեպի Ռուսաստան և Չինաստան։
Սենատորը նշել է, որ Պանամայի ջրանցքը գրավելու, Գրենլանդիան գնելու և Կանադան ԱՄՆ 51-րդ նահանգ դարձնելու մասին Թրամփի վերջին հայտարարությունները ազդում են «Ամերիկայի հեղինակության վրա ամբողջ աշխարհում»։
«Մեր դաշնակիցները չգիտեն՝ մենք վստահելի գործընկերներ ենք, թե ոչ»,- ասել է Քարդինը, ով այս ժամկետի ավարտին լքում է Սենատը։
Քաղաքական գործիչը հիշեցրել է, որ ԱՄՆ-ի և Պանամայի պարտավորությունները սահմանվել են 1977 թվականի Պանամայի ջրանցքի և չեզոքության պայմանագրով և վավերացվել Կոնգրեսի կողմից։
«Ես չգիտեմ, թե ինչ է ասում նորընտիր նախագահը, թե որքան անկեղծ է նա, բայց կարող եմ ձեզ ասել, որ դա հարցեր է առաջացնում ամբողջ աշխարհում, թե արդյոք մենք վստահելի գործընկեր ենք: Եվ դա իսկապես մեծացնում է այլ երկրների հետաքրքրությունը Ռուսաստանի և Չինաստանի նկատմամբ այն առումով, թե արդյոք նրանք պետք է դաշինքներ կնքեն Ռուսաստանի և Չինաստանի հետ, արդյոք Ամերիկան կաջակցի նրանց ամբողջ աշխարհում»,- նշել է սենատորը։
Քարդինը Թրամփի խոսակցությունները Դանիայի կառավարությունից Գրենլանդիան գնելու մասին և Կանադան ԱՄՆ 51-րդ նահանգ դարձնելու մասին կատակները, երկրի վարչապետ Ջասթին Թրյուդոյի ծաղրանքին զուգընթաց անիմաստ խոսակցություն է անվանել։
«Ամբողջ աշխարհում մենք տեսել ենք նույն տիպի հայտարարություններ, ինչ արվում էին նրա նախորդ վարչակազմի ժամանակ, երբ նա սպառնում էր դուրս գալ ՆԱՏՕ-ից։ Սրանք պայմանագրային պարտավորություններ են, որոնց վրա հենվում են մեր դաշնակիցները, և դա լուրջ մտահոգություն է առաջացնում, թե արդյոք Ամերիկան կպահպանի դրանք», – ասաց նա:
Պատասխանելով Թրամփի երկրորդ վարչակազմի օրոք Ուկրաինայի ապագայի մասին հարցին՝ Քարդինն ասել է, որ մինչ ԱՄՆ Կոնգրեսում դեռևս կար երկկուսակցական աջակցություն, Ուկրաինայի վերաբերյալ Թրամփի արտահայտությունները «շատ մտահոգիչ էին»:
