Իրանում ձերբակալել են իտալացի լրագրող Չեչիլիա Սալային
Իտալացի լրագրող Չեչիլիա Սալան բռնվել է Թեհրանում, նշել է Իտալիայի արտաքին գործերի նախարարության հայտարարությունում։
Սալան ռեպորտաժ էր վարում Իրանի մայրաքաղաքում, երբ դեկտեմբերի 19-ին նրան «կանգնեցրել է Թեհրանի ոստիկանությունը», նշված է հայտարարությունում։
Իտալիայի ԱԳՆ-ն «համագործակցում է Իրանի իշխանությունների հետ, որպեսզի պարզի Չեչիլիա Սալայի իրավավիճակը եւ ստուգի նրան բռնելու պայմանները»։
Ուրբաթ լրագրողին բանտում այցելել էր Իտալիայի դեսպան Պաոլա Ամադեին՝ «ստուգելու համար նրա պահման պայմանները», նշվել է հայտարարությունում։ Նշվել է, որ ավելի վաղ նրան թույլատրել էին երկու հեռախոսազանգ կատարել հարազատներին։
Ինչպես տեղեկացրել է CNN-ը, Սալայն Il Foglio իտալական թերթի թղթակից է, որը պնդում է, որ լրագրողին պահում են Թեհրանի Էվին բանտում։ Il Foglio-ի տեղեկացմամբ՝ Չեչիլիան Իրանում էր «սովորական վիզայով, որպեսզի ռեպորտաժներ պատրաստեր երկրի մասին, որը նա ճանաչում եւ սիրում է»։
Իտալական Chora Media պարբերականը, որտեղ եւս աշխատում է Սալան, հայտնել է, որ դեկտեմբերի 12-ին նա հեռացել է Հռոմից «լրագրողի վավեր վիզայով եւ գործուղման մեջ գտնվող լրագրողի պաշտպանությամբ»:
«Նա մի քանի հարցազրույց է անցկացրել եւ Chora News-ի համար Stories փոդքասթի երեք դրվագ պատրաստել»,- նշվել է հրապարակման մեջ եւ ավելացվել, որ Սալայի կալանավորման մասին տեղեկություն է հրապարակվում միայն հիմա, քանի որ նրա ծնողները եւ Իտալիայի իշխանությունները խնդրել են լռել՝ հուսալով լրագրողի արագ ազատումը։
Իտալիայի պաշտպանության նախարար Գվիդո Կրոզետոն ուրբաթ օրը X-ին ասել է, որ «ամբողջ կառավարությունն» աշխատում է Սալայի ազատ արձակման համար՝ միաժամանակ նշելով, որ «Իրանի հետ բանակցությունները, ցավոք, չեն որոշվում արեւմտյան հասարակական կարծիքի մասնակցությամբ եւ ժողովրդական վրդովմունքի ուժով, այլ միայն քաղաքական եւ բարձր մակարդակի դիվանագիտական գործողություններով»:
Սալայի ինսթագրամյան օգտահաշվում կան վերջերս կատարված գրառումներ կանանց մասին, որոնց հետ նա ծանոթացել է Իրանում։
