Կատարի իշխանությունները հայտնել են, որ կհամագործակցեն Թրամփի վարչակազմի հետ Գազայի հարցում
Կատարը կհամագործակցի Թրամփի ապագա վարչակազմի հետ Գազայի հարցում, շաբաթ հայտնել է Կատարի վարչապետ, արտաքին գործերի նախարար, շեյխ Մուհամեդ բեն Աբդուլռահման Ալ Թանին, տեղեկացրել է Reuters-ը։
«Մենք մեծ աջակցություն ենք տեսել ապագա վարչակազմի կողմից, եւ դա ստիպել է մեզ (փորձել) գործը շարժել մեռյալ կետից եւ ամեն բան վերադարձնել իր հուն, եւ մենք մասնակցել ենք դրան վերջին մեկ-երկու շաբաթներում»,- ասել է Ալ Թանին Դոհայի կոնֆերանսում։
Սթիվ Վիթքոֆը, որը պաշտոնապես կզբաղեցնի բանագնացի պաշտոնը Թրամփի վարչակազմում, նոյեմբերի վերջին հանդիպել է Իսրայելի վարչապետ Բենիամին Նեթանյահուի եւ Ալ Թանիի հետ, տեղեկացրել է գործակալությունը՝ հղում կատարելով աղբյուրին։
Վիթքոֆը մեկնել է Կատար եւ Իսրայել, որպեսզի դիվանագիտական աշխատանք սկսի հրադադարի եւ պատանդների ազատ արձակման համաձայնագրի ուղղությամբ՝ մինչեւ նորընտիր նախագահի երդմնակալությունը 2025թ. հունվարի 20-ին, հինգշաբթի տեղեկացրել է Reuters-ին աղբյուրը, որը տեղյակ է բանակցությունների ընթացքի մասին։
Պատերազմը Գազայում ընթանում է արդեն ավելի քան 14 ամիս, անկլավի մեծ մասը ավերված է, ավելի քան 40 000 պաղեստինցի սպանվել է, իսկ իսրայելական զորքերը շարունակում են ռմբակոծել տարածքը։
