Հարավային Կորեայի նախագահը ներողություն է խնդրել ռազմական դրություն մտցնելու համար
Հարավային Կորեայի նախագահ Յուն Սոկ Յոլը ներողություն է խնդրել երկրի բնակիչներից՝ ռազմական դրություն մտցնելու որոշման համար։ Այս մասին նա հայտարարել է հեռուստատեսային ուղիղ եթերում, փոխանցում է ՏԱՍՍ-ը։
«Ես ներողություն եմ խնդրում իմ արարքների համար։ Ես չեմ պատրաստվում խուսափել ռազմական դրություն հայտարարելու հետ կապված գործողությունների համար քաղաքական եւ իրավական պատասխանատվությունից», – հայտարարել է նա ուղիղ հեռուստատեսային ուղերձում, որից հետո խոնարհվել է:
Նախագահը ներողություն է խնդրել քաղաքացիներից առաջացած անհանգստության և անհարմարության համար:
Յուն Սոկ Յոլն արտակարգ ռազմական դրություն էր հայտարարել դեկտեմբերի 3-ի երեկոյան՝ անակնկալ հեռուստաուղերձով դիմելով ժողովրդին և ընդդիմությանը մեղադրելով «հակապետական» գործողությունների միջոցով կառավարությունը «կաթվածահար անելու» մեջ։
Ռազմական դրության հայտարարումից հետո զինվորականները մտել էին խորհրդարանական համալիրի տարածք և բախվել մարդկանց մեծ խմբի հետ, որը փորձել էր փակել նրանց ճանապարհը։ Միաժամանակ, մարդկանց մեկ այլ՝ ավելի մեծ խումբ ընդհարվել էր ոստիկանության և անվտանգության աշխատակիցների հետ։
Դեկտեմբերի 4-ի վաղ առավոտյան նախագահը չեղարկել էր ռազմական դրությունն Ազգային ժողովի քվեարկությունից հետո, որի արդյունքում պատգամավորները միաձայն պահանջել էին չեղյալ համարել այն։
