Աֆրոամերիկացիներին Թրամփի հաղթանակից հետո ստրկությամբ են սպառնացել. WP
ԱՄՆ-ի որոշ նահանգներում սևամորթ ամերիկացիները նախագահական ընտրություններից հետո ռասիստական տեքստային հաղորդագրություններ են ստացել, որոնց կազմողները սպառնում էին նրանց ստրկության տանել՝ պլանտացիաներում աշխատելու համար: Հետաքննությունների դաշնային բյուրոն և նահանգի իշխանությունները հետաքննություն են անցկացնում, հաղորդում է The Washington Post-ը (WP):
Դրա տվյալներով՝ 12 նահանգներում և Կոլումբիայի շրջանում ամերիկացիները ստացել են հաղորդագրություններ անհայտ ուղարկողներից՝ ստրկական աշխատանքի հիշեցումներով։ Այս SMS հաղորդագրությունների մեծ մասն ուղարկվել է սևամորթ ուսանողներին:
«Դուք ընտրվել եք մոտակա պլանտացիայում բամբակ հավաքելու համար: Փաթեթավորեք ձեր իրերը և պատրաստ եղեք մինչև 13:00-ը: Մեր ստրուկ վերակացուները ձեզ մոտ կգան շագանակագույն ֆուրգոնով, պատրաստվեք խուզարկության, երբ հայտնվեք պլանտացիայում»,- ասվում է հաղորդագրություններից մեկում, որի տեքստը մեջբերում է հրատարակությունը։
Որոշ SMS-ներ պնդում են, որ իրենց ուղարկողը երկրի ընտրված նախագահ Դոնալդ Թրամփի կողմնակիցն է կամ կապված է նրա վարչակազմի հետ, նշում է թերթը։ Թրամփի թիմը հերքել է նամակագրության հետ որևէ կապ: «Քարոզարշավը բացարձակապես կապ չունի այս զեկույցների հետ», – WP-ին ասել է հանրապետական քարոզարշավի խոսնակ Քերոլայն Լևիթը:
