Պուտինը ծննդյան օրը շփվելու է ԱՊՀ երկրների ղեկավարների հետ
«Հոկտեմբերի 7-ի երեկոյան՝ իր ծննդյան օրը, ՌԴ նախագահ Վլադիմիր Պուտինը ոչ պաշտոնական շփվելու է ԱՊՀ երկրների ղեկավարների հետ, իսկ հոկտեմբերի 8-ին նախատեսվում է ԱՊՀ գագաթնաժողովը»,- այս մասին լրագրողների հետ զրույցում հայտնել է ՌԴ նախագահի մամուլի քարտուղար Դմիտրի Պեսկովը։
«Երեկոյան նախագահը ոչ պաշտոնական շփում կունենա ԱՊՀ երկրների պետությունների և կառավարությունների ղեկավարների հետ, ովքեր այդ ժամին կժամանեն Մոսկվա՝ մասնակցելու վաղվա ԱՊՀ-ի գագաթնաժողովին»,- ասել է Կրեմլի ներկայացուցիչը։
Նա նաև հավելել է, որ Պուտինը փակ աշխատանքային հանդիպումներ է ունեցել, և այսօր նախատեսված է միջազգային զանգ։ Առաջին անգամը չէ, որ Պուտինն իր ծննդյան օրն անցկացնում է ԱՊՀ ղեկավարների ոչ պաշտոնական հավաքով, հաջորդ օրը կազմակերպելով պաշտոնական հավաք։ Սա արդեն ավանդական դարձած ձևաչափ է։
Հիշեցնենք, որ Նիկոլ Փաշինյանը շնորհավորական ուղերձ է հղել Վլադիմիր Պուտինին, ինչպես նաև մեկնել Մոսկվա՝ մասնակցելու այսօր նախատեսվող ոչ պաշտոնական հավաքին, իսկ վաղը՝ ԱՊՀ գագաթնաժողովին։
