ՆԳՆ-ն 1 միլիարդ 316 մլն 550.000 դրամով հրատապ գնել է ունիվերսալ թափքով 67 մեքենա
Ներքին գործերի նախարարությունը հրատապ կարգով ձեռք է բերել «Վոլվո» մակնիշի ունիվերսալ թափքով 67 մեքենա․ գնման պայմանագիրը կնքվել է նախօրեին՝ սեպտեմբեր 25-ին, «Ավանտգարդ» ՍՊ ընկերության հետ։ Ըստ պայմանագրի՝ մեկ մեքենան արժեցել է 19 միլիոն 650.000 դրամ, իսկ ընդհանուր գնումը՝ 1 միլիարդ 316 մլն 550.000 դրամ։
Թեև «Ավանտգարդ» ՍՊԸ-ն իրավաբանական անձանց ռեգիստրում ընդամենը 2023 թվականից է գրանցված ու պետգնումներում էլ գերակտիվ մատակարար է հանդես գալիս 2024 թվականից, սակայն այս ընկերության սեփականատիրոջը՝ Էդվարդ Ավետիսյանին պատկանող մեկ այլ ընկերություն՝ «Ավանգարդ Մոթորս» ՍՊԸ-ն, պետգնումներում վաղուց հանդես է գալիս իբրև պետական գերատեսչությունների մատակարար։
Իսկ ընկերությունների պատվիրատուներն են Ներքին գործերի, արտաքին գործերի, պաշտպանության, տարածքային կառավարման նախարարությունները, Ազգային ժողովը, Պետական պահպանության ծառայությունը և այլ պետական գերատեսչություններ։
