Երևանում կբացվի Իրանի առաջին և ամենամեծ մշտական առևտրի կենտրոնն արտերկրում
Երևանում հոկտեմբերի 1-ին նախատեսվում է բացել Իրանի առևտրի կենտրոն՝ որպես դարպաս դեպի Եվրասիական տնտեսական միություն (ԵԱՏՄ), գրում է Tasnim գործակալությունը:
Այն կլինի Իրանի առաջին և ամենամեծ մշտական առևտրի կենտրոնն արտերկրում և կբացվի Իրանի Առևտրի խթանման կազմակերպության (TPOI) հետ համագործակցությամբ:
Կենտրոնը նախագծվել և մշակվել է Երևանում՝ ավելի քան 18,000 քմ տարածքի վրա։ Կենտրոնի 10,000 քմ մակերեսով ցուցահանդեսային տարածքը ներառում է տարբեր չափերի 107 ցուցահանդեսային տաղավարներ: Այն ներառում է նաև կոնֆերանսների սենյակ բիզնես-բիզնես (B2B) հանդիպումների համար և բաց տարածք միջոցառումների, կոնֆերանսների և փառատոնների անցկացման համար:
Բացման արարողությանը կմասնակցեն Հայաստանի էկոնոմիկայի նախարարը, Իրանի արդյունաբերության, հանքերի և առևտրի նախարարը, Իրանի խոշորագույն արդյունաբերական կենտրոնների գործարարներն ու գործադիր տնօրենները։
