Նեթանյահուն նոր հարվածներով է սպառնացել հութիներին
Իսրայելի վարչապետ Բենիամին Նեթանյահուն սպառնացել է Եմենի հութիներին այն բանից հետո, երբ Եմենից բալիստիկ հրթիռ է արձակվել Իսրայելի կենտրոնական մաս, գրում է Times of Israel-ը։
«Հութիներն արդեն պետք է իմանային, որ մենք մեծ գին ենք պահանջում մեզ վնասելու ցանկացած փորձի համար,- հայտարարել է նա կառավարության նիստի սկզբում:- Նրանք, ովքեր հիշեցման կարիք ունեն, կարող են այցելել Հոդեյդա նավահանգիստ»:
Իսրայելը հարված էր հասցրել հութիների վերահսկած գլխավոր նավահանգստին հուլիսի 20-ին այն բանից հետո, երբ խմբավորման կողմից արձակված անօդաչուն գրոհեց Թել Ավիվը, ինչի հետևանքով զոհվեց մեկ և վիրավորվեց չորս մարդ: Հութիների ռազմական ներկայացուցիչ Յահյա Սարին ստանձնեց հրթիռային այդ հարվածի պատասխանատվությունը:
«Նա, ով կհարձակվի մեզ վրա, չի խուսափի մեր հասանելիությունից: ՀԱՄԱՍ-ն արդեն հասկանում է դա»,- հավելել է նա՝ հայտարարելով, որ Գազայում ՀԱՄԱՍ-ը կոչնչացվի, և բոլոր պատանդները կազատվեն։
Պատասխանելով Իսրայելի հյուսիսի բնակիչների զայրացած կոչերին՝ կապված լիբանանյան «Հեզբոլլահ» շարժման ամենօրյա հարձակումների պատճառով այնտեղ անվտանգության վիճակի վատթարացման հետ, Նաթանյահուն հայտարարել է, որ «ստատուս քվոն չի շարունակվի»:
Նա սահմանի երկայնքով «ուժերի հավասարակշռությունը փոխելու» կոչ է արել և խոստացել «անհրաժեշտ ամեն բան անել», որպեսզի հյուսիսային շրջանի իսրայելցիները կարողանան վերադառնալ իրենց տները:
Նաթանյահուն նաև միասնության կոչ է արել՝ ասելով, որ հաղթանակը կգա «երբ միասնական ազգը հանդես գա մեր թշնամիների դեմ, որպեսզի ապահովի մեր ապագան»:
