Դադար եմ վերցրել, որպեսզի լիցքաթափվեմ. Սաութգեյթ
Անգլիայի ազգային հավաքականի նախկին գլխավոր մարզիչ Գարեթ Սաութգեյթը հայտնել է, որ չի պատրաստվում մոտ ապագայում վերադառնալ աշխատանքի:
«Չեմ պատրատսվում շտապել այդ հարցում։ Աշխատանքի շատ տարբերակներ ունեմ և բաց եմ դրանք քննարկելու հարցում։ Ընդ որում, դա կարող է լինել ինչպես բուն ֆուտբոլային, այնպես էլ դրանից դուրս աշխատանք։ Ես, պարզապես, դադար եմ վերցրել, որպեսզի լիցքաթափվեմ, վերականգնեմ ուժերս ու առաջ շարժվեմ։
8 տարի անհավանական ճանապարհ եմ անցել և բացարձակ արտոնություն եմ ունեցել մարզել իմ երկրի ազգային հավաքականը, աշխատել եմ հիասքանչ ֆուտբոլիստների ու անձնակազմի հետ»,- 54-ամյա մասնագետի խոսքերը մեջբերում է Sky News-ը։
Գարեթ Սաութգեյթն Անգլիայի հավաքականը մարզել է 2016-2024 թթ.։ Այդ ընթացքում թիմը 102 խաղում տարել է 64 հաղթանակ, գրանցել 20 ոչ-ոքի, կրել 18 պարտություն, երկու անգամ անընդմեջ հասել Եվրոպայի առաջնության եզրափակիչ։ Անգլիացիները Սաութգեյթի գլխավորությամբ մեկ անգամ էլ հանդես են եկել աշխարհի առաջնության կիսաեզրափակչում։
