Դատարանն Առուշ Առուշանյանին դատապարտել է ազատազրկման՝ 1 տարի 8 ամիս ժամկետով
Սյունիքի մարզի առաջին ատյանի ընդհանուր իրավասության դատարանը մասնակիորեն բավարարել է ՀՀ ԱՆ Պրոբացիայի ծառայության միջնորդությունը Գորիսի քաղաքապետ Առուշ Առուշանյանի գործով։
Այսօր դատարանը որոշում է ընդունել ՀՀ ԱՆ Պրոբացիայի ծառայության միջնորդությունը բավարարել մասնակի՝ Առուշ Առուշանյանի նկատմամբ 2022 թվականի մարտի 28-ի դատավճռով նշանակված տեղական ինքնակառավարման մարմիններում պաշտոն զբաղեցնելու իրավունքից 5 տարի ժամկետով զրկելու պատիժը փոխարինելով 1 տարի 8 ամիս 3 օր ժամկետով ազատազրկմամբ։
Դատարանի վճռով՝ Առուշանյանին ՏԻՄ-երում ղեկավար պաշտոններ զբաղեցնելու իրավունքից զրկելու 3 օրը կհաշվարկվի ազատազրկման մեկ օրվա դիմաց։ Որոշումը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո 10-օրյա ժամկետում։
Ավելի վաղ՝ ՀՀ արդարադատության նախարարությունը հայտնել էր, որ Առուշ Առուշանյանի պատիժն ազատազրկմամբ փոխարինելու վերաբերյալ Պրոբացիայի ծառայությունը միջնորդություն է ներկայացրել դատարան:
