ԱՄՆ-ի զինվորականները Եմենում ոչնչացրել են հութիների մի քանի ԱԹՍ և հրթիռային կայանք
ԱՄՆ զինված ուժերը Եմենում ոչնչացրել են հութիների անօդաչու թռչող սարքեր և հրթիռային կայանքներ: Այս մասին հաղորդում է ԱՄՆ զինված ուժերի կենտրոնական հրամանատարությունը (CENTCOM)։
«Վերջին 24 ժամվա ընթացքում ԱՄՆ կենտրոնական հրամանատարության ուժերն Իրանի աջակցությունը վայելող հութիների կողմից վերահսկվող Եմենի տարածքում հաջողությամբ ոչնչացրել են հութիների երեք անօդաչու թռչող սարք և երկու հրթիռային կայանք»,- հաղորդել է հրամանատարությունը X սոցիալական հարթակում:
Հաղորդագրության համաձայն՝ «որոշվել է, որ այդ կայանքներն ակնհայտ և անմիջական սպառնալիք են ներկայացնում տարածաշրջանում ԱՄՆ-ի և կոալիցիայի ուժերի, ինչպես նաև առևտրային նավերի համար»:«Այդ գործողությունները ձեռնարկվել են ազատ նավագնացությունը պաշտպանելու և միջազգային ջրերն ավելի ապահով դարձնելու համար», – ընդգծել են CENTCOM-ում:
2023 թ. հոկտեմբերի 7-ին ՀԱՄԱՍ արմատական շարժման զինյալների հարձակումից հետո Իսրայելը ռազմական գործողություններ է իրականացնում Գազայի հատվածում։ Պատերազմի ընթացքում հութիներն, ի նշան պաղեստինցիներին աջակցության, պարբերաբար հարվածներ են հասցնում Կարմիր ծովով անցնող նավերին։
Այս ընթացքում նրանք հարձակվել են ավելի քան 80 նավի վրա։ Ի պատասխան՝ ԱՄՆ-ն և Մեծ Բրիտանիան կանոնավոր կերպով հարվածներ են հասցնում Եմենում հութիների օբյեկտներին։
