Համաշխարհային աշխարհակարգն այնպիսի վտանգի տակ է, ինչպիսին չի եղել «սառը պատերազմից» ի վեր. MI6-ի և ԿՀՎ-ի ղեկավարների հայտարարությունը
Համաշխարհային կարգը «այնպիսի վտանգի տակ է, ինչպիսին մարդկությունը չի տեսել «սառը պատերազմից» ի վեր», կարծում են Մեծ Բրիտանիայի արտաքին հետախուզության՝ MI6 ծառայության ղեկավար Ռիչարդ Մուրը և նրա ամերիկացի գործընկերը՝ Կենտրոնական հետախուզական վարչության տնօրեն Ուիլյամ Բերնսը։ Այս թեմայով նրանց համատեղ հոդվածը՝ երկու ստորագրությամբ, հրապարակվել է Financial Times-ում. նախկինում նման բան երբեք չի հրապարակվել:
Հետախուզության բարձրաստիճան սպաների խոսքով՝ Լոնդոնը և Վաշինգտոնն ակտիվորեն համագործակցում են միասնական ճակատ ստեղծելու համար՝ «դիմադրելու Ռուսաստանի ագրեսիվ մղումներին և ՌԴ նախագահ Վլադիմիր Պուտինի նվաճողական պատերազմին Ուկրաինայում»:
Օվկիանոսի երկու կողմերում ԿՀՎ-ի և MI6-ի սպաները հակազդում են Ռուսաստանի կողմից Եվրոպայում իրականացվող «դիվերսիոն արշավին»՝ միաժամանակ փորձելով նվազեցնել հակամարտության լարվածությունը Մերձավոր Արևելքում և պայքարելով ահաբեկչության դեմ՝ կանխելու «Իսլամական պետության» վերածնունդը, ասվում է հոդվածում։
«Կասկած չկա, որ միջազգային աշխարհակարգը` հավասարակշռված համակարգը, որը մոլորակին հասցրեց հարաբերական խաղաղության և կայունության՝ միաժամանակ բարձրացնելով կենսամակարդակը, բացելով նոր հնարավորություններ և հիմք դնելով բարգավաճման համար, այժմ այնպիսի վտանգի տակ է, ինչպիսին չի եղել «սառը պատերազմից» ի վեր»,- կարծում են հոդվածի հեղինակները։
Այս «վտանգների աննախադեպ համակցություններից» մեկը, որին բախվում են երկու երկրները, պատերազմն է Ուկրաինայում:
