Մաքսային մարմնի կողմից հավաքագրվող եկամուտները պակասել են, հարկային մարմնի կողմից հավաքագրվողը՝ աճել

Հայաստանում այս տարվա առաջին կիսամյակում հարկային մարմնի կողմից հավաքագրվող հարկերն ավելացել են 123 մլրդ դրամով, իսկ մաքսային մարմնի կողմից հավաքագրվող մուտքերը պակասել են 62.9 մլրդ դրամով: Այս մասին ասաց Պետական եկամուտների կոմիտե նախագահ Ռուստամ Բադասյանն ԱԺ ֆինանսավարկային և բյուջետային հարցերի հանձնաժողովի նիստում 2024 թվականի պետական բյուջեի առաջին կիսամյակի կատարման ընթացքի վերաբերյալ հաշվետվության ներկայացմանը:

Անդրադառնալով հարկային եկամուտներին՝ ՊԵԿ նախագահն ասաց. «Առաջին կիսամյակի կատարողականը 1 տրլն 187.6 մլրդ դրամ է կազմում, որը 60.1 մլրդ դրամով կամ 5.3 տոկոսով ավելին է, քան անցյալ տարվա նույն ժամանակահատվածում: Այսինքն՝ ավելի շատ հարկ ենք հավաքել անցյալ տարվա համեմատ»:

Անդրադառնալով պետբյուջեի մասին օրենքով պլանավորվածի նկատմամբ թերակատարմանը՝ ՊԵԿ նախագահը ներկայացրեց, թե որ հարկատեսակն ինչ չափով է նվազել: Օրինակ՝ ավելացված արժեքի հարկը 4.9 տոկոսով նվազել է: «Սակայն տեսնենք, թե որ ավելացված արժեքի հարկն է, որ նվազել է. մաքսային մարմնի կողմից հավաքագրվողը, այն նվազել է 34.7 տոկոսով: Դա բացարձակ մեծությամբ 62.8 մլրդ դրամ է: Այսինքն՝ պակասել են ներմուծումները: Ներմուծման ժամանակ սահմանին վճարվող ավելացված արժեքի հարկն ամենաարագ հավաքագրվող հարկատեսակներից մեկն է: Ներմուծումը պակասել է, հետևաբար պակասել է այս եկամուտը:  Հարկային մարմնի կողմի հավաքագրված հարկերն ավելացել են 123 մլրդ դրամով, որը կազմում է 14 տոկոս, իսկ մաքսային մարմնի կողմից հավաքագրվող մուտքերը պակասել են 62.9 մլրդ դրամով կամ 25.2 տոկոսով»,-ասաց Ռուստամ Բադասյանը:

Ներմուծումների նվազումն, ըստ Բադասյանի, պայմանավորված է մի քանի ապրանքատեսակների նշանակալի ազդեցությամբ: Առաջինը՝ անցյալ տարվա օգոստոսի 1-ից ՌԴ-ում ընդունված օրենքով պայմանավորված՝ նվազել է ավտոմեքենաների ներմուծումը: Ավտոմեքենաների ներմուծման մեծ բում էր նկատվել, որն այս տարվա առաջին կիսամյակում չի եղել: 

«Երկրորդ՝ ակցիզային հարկի մասով էլ ունենք 5.9 մլրդ դրամի նվազում, որը հիմնականում պայմանավորված է ծխախոտի ներմուծման ծավալների նվազմամբ, ինչն էլ պայմանավորված է որոշ օրենսդրական փոփոխություններով: Այսինքն՝ ներմուծողներն ամեն ինչ արել են, որ անցյալ տարվա ավարտին մեծ ներմուծումներ ունենան, որ որոշակի կարգավորումներ իրենց վրա չտարածվեն: Հիմնական նվազեցումները բաժին են ընկնում ներմուծմանը»,-ասաց ՊԵԿ նախագահը՝ հավելելով, որ այլ գործոններ ևս կան: