Բորելը Գազայում եռօրյա հրադադարի կոչ է արել՝ պոլիոմիելիտի դեմ պատվաստումների համար
Եվրամիության դիվանագիտության ղեկավար Ժոզեպ Բորելը կոչ է արել Գազայի հատվածում անհապաղ եռօրյա հրադադար հաստատել՝ երեխաներին պոլիոմիելիտի դեմ պատվաստումներ կատարելու համար։ Այդ մասին նա գրել է X սոցիալական հարթակում։
«Պոլիոմիելիտի արագ տարածումն սպառնում է Գազայի բոլոր երեխաներին, որոնք արդեն ուժասպառ են եղել տեղահանության, զրկանքների և թերսնման պատճառով: Կոչ եմ անում անհապաղ հրադադար հաստատել երեք օրով՝ Առողջապահության համաշխարհային կազմակերպության (ԱՀԿ) և ՅՈՒՆԻՍԵՖ-ի կողմից պատվաստումներ իրականացնելու համար՝ անկախ ավելի լայն բանակցություններից», – գրել է Բորելը։
Օգոստոսի 16-ին Պաղեստինի առողջապահության նախարարությունը հայտարարել է, որ Գազայի հատվածի կենտրոնական մասում գրանցվել է պոլիոմիելիտի առաջին հաստատված դեպքը 10 ամսական երեխայի մոտ։ Դրանից մի քանի ժամ առաջ ԱՀԿ-ն և ՅՈՒՆԻՍԵՖ-ը համատեղ հայտարարությամբ հայտնել էին Գազայում պոլիոմիելիտի դեմ պատվաստման երկփուլ արշավի մասին. այն տեղի կունենա օգոստոսի վերջին և սեպտեմբերին:
ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկն օգոստոսի 27-ին հայտարարել է, որ ՄԱԿ-ը նախապատրաստում է Գազայի հատվածում 11 բժշկական կենտրոնների աշխատանքը, որոնցում կիրականացվեն պատվաստումներ։ Նրա գնահատմամբ՝ պատվաստում կստանա մինչև 10 տարեկան ավելի քան 640 000 երեխա:
