Էստոնիայի ուղղափառ եկեղեցին անկախություն է հայտարարել Ռուս ուղղափառ եկեղեցուց
Մոսկվայի պատրիարքարանի Էստոնիայի ուղղափառ եկեղեցին (ՄՊ ԷՈւԵ) անվանումից հանել է պատրիարքարանի հիշատակումը և խզել կապերը Ռուս ուղղափառ եկեղեցու (ՌՈւԵ) հետ։ Ինչպես տեղեկանում ենք Deutsche Welle-ի ռուսական ծառայությունից, այս մասին հաղորդել են ԷՈւԵ-ից՝ վկայակոչելով օգոստոսի 20-ին տեղի ունեցած եկեղեցական ժողովի որոշումը։
«Ժողովն ընդունել է եկեղեցու կանոնադրության նոր խմբագրում, որում ամրագրվում է անկախությունը եկեղեցական-վարչական, եկեղեցական-տնտեսական, եկեղեցական-լուսավորական և եկեղեցական-քաղաքացիական գործերում: Հաղորդագրության մեջ ասվում է նաև, որ եկեղեցու անվանումը փոխվել է «Էստոնիայի ուղղափառ եկեղեցի»», – նշված է հաղորդագրության մեջ:
Բացի այդ, ժողովը հավանություն է տվել սինոդի գործունեությանը պետության հետ բանակցային գործընթացում և վստահություն հայտնել, որ Էստոնիայում ուղղափառներն ուղիներ և միջոցներ կգտնեն` «ապաքինելու պառակտումը կանոնականության, փոխադարձ հարգանքի և իրավահավասարության հիման վրա»։
Տալլինի և Համայն Էստոնիայի միտրոպոլիտ Եվգենին, որը Ռուսաստանի քաղաքացիություն ունի և փետրվարին վտարվել է Էստոնիայից, ժողովի նիստին մասնակցել է տեսակապի միջոցով։
