ՄԱԿ-ում լուրջ մտահոգություն են հայտնել Ադրբեջանում իրավապաշտպանների ու լրագրողների կալանավորման և հետապնդման կապակցությամբ
Միավորված ազգերի կազմակերպության (ՄԱԿ) Իրավապաշտպանների իրավիճակի գծով հատուկ զեկուցող Մերի Լոուլորը լուրջ մտահոգություն է հայտնել Ադրբեջանում վեց իրավապաշտպանների և լրագրողների կալանավորման և հետապնդման կապակցությամբ։
Այս մասին նշված է ՄԱԿ-ի կողմից տարածված մամուլի հաղորդագրության մեջ։«Վերջին ամիսներին ես ականատես եմ եղել Ադրբեջանում իրավապաշտպանների և լրագրողների դեմ ձերբակալությունների և քրեական գործերի տագնապալի ալիքի», – ասել է Լոուլորը՝ հավելելով, որ ինքը կառավարության առջև նման երկու դեպքի մասին հարց է բարձրացրել, որոնք այս մտահոգիչ միտումի մաս են կազմում։
Նրա դիտարկմամբ՝ հակակոռուպցիոն հետաքննությունները, ընտրությունների անկախ մոնիտորինգը և մարդու իրավունքների միջազգային պաշտպանությունը բոլորն էլ օրինական աշխատանք են մարդու իրավունքների ոլորտում, սակայն այս աշխատանքի և խոսքի ազատության կիրառման համար հաշվեհարդարը մարդու իրավունքների միջազգային իրավունքի ակնհայտ խախտում է:
Հատուկ զեկուցողը անհանգստություն է հայտնել Abzas Media գրասենյակից և ձերբակալված լրագրողների և իրավապաշտպանների տներից էլեկտրոնային սարքերի և փաստաթղթերի առգրավման առնչությամբ, որը կարող է վտանգի ենթարկել հակակոռուպցիոն հետաքննության նրանց աղբյուրները:Նա հավելել է, որ Ադրբեջանի իշխանությունները սահմանափակել են նաև ձերբակալվածների շփումը փաստաբանների և որոշ դեպքերում՝ նրանց ընտանիքների հետ։«Ադրբեջանի կողմից Մամեդլիի գործով արդարությունը չվերականգնելն ավելի քան վեց տարի բացահայտում է երկրում արդյունավետ պաշտպանության միջոցների բացակայությունը և մտավախություն է առաջացնում, որ իրավապաշտպանների իրավունքների խախտումները կարող են կրկնվել», – ընդգծել է Մերի Լոուլորը՝ շեշտելով, որ ինքը չի ցանկանում միջամտել դատական գործընթացին, բայց կոչ է անում կառավարությանն ապահովել, որ հետաքննությունը լիովին համապատասխանի մարդու իրավունքների իր պարտավորություններին:
«Ադրբեջանում բոլոր իրավապաշտպաններն ու լրագրողները պետք է կարողանան աշխատել ազատ և ապահով միջավայրում՝ առանց ահաբեկման և ոտնձգությունների», – եզրափակել է նա։
