Հռոմի պապն աղոթել է Օլիմպիական խաղերի ժամանակ պատերազմող երկրների միջև զինադադարի համար
Հռոմի պապ Ֆրանցիսկոսը կիրակի հույս է հայտնել, որ Փարիզի Օլիմպիական և Պարալիմպիկ խաղերը հնարավորություն կտան պատերազմող երկրներին հարգել հին հունական ավանդույթները և զինադադար հաստատել խաղերի ընթացքում։ «Հին ավանդույթի համաձայն՝ թող Օլիմպիական խաղերը պատերազմներում զինադադար հաստատելու հնարավորություն ընձեռեն՝ խաղաղության անկեղծ ցանկություն դրսևորելով»,- ասել է Ֆրանցիսկոս պապը Վատիկանի Սուրբ Պետրոսի հրապարակում աղոթքի ժամանակ, հաղորդում է Vatican News-ը:
Հռոմի պապն ընդգծել է, որ սպորտն ունի նաև «ահռելի սոցիալական ուժ, որը կարող է խաղաղ ճանապարհով միավորել տարբեր մշակույթի մարդկանց»։
«Հուսով եմ, որ այս միջոցառումը կարող է դառնալ ներառական աշխարհի նշան, որը մենք ցանկանում ենք կառուցել, և որ մարզիկները, իրենց մարզական վկայությամբ, կարող են լինել խաղաղության դեսպաններ և արժեքավոր օրինակներ երիտասարդների համար», – ավելացրել է Ֆրանցիսկոսը:
Հռոմի պապը նաև խնդրել է հավատացյալներին աղոթել խաղաղության համար՝ հիշեցնելով ամբողջ աշխարհում շարունակվող հակամարտությունները։
«Եկեք չմոռանանք Ուկրաինայի, Պաղեստինի, Իսրայելի, Մյանմայի և շատ այլ պատերազմող երկրների նահատակների մասին։ Չմոռանանք, որ պատերազմը պարտություն է»,- եզրափակել է նա։
Հուլիսի 26-ին Փարիզում տեղի կունենա 33-րդ Օլիմպիական խաղերի բացման հանդիսավոր արարողությունը, որին կմասնակցի մարզիկների 205 պատվիրակություն, որոնք 80-ից ավելի նավակներով կշարժվեն Սենով։
