«Արևմուտքը ձգտում է ոչ միայն «սեպ խրել», այլև Հայաստանին հեռացնել դաշնակիցներից»․ ՀԱՊԿ-ում ՌԴ մշտական ներկայացուցիչ
ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը «Ռիա Նովոստի»-ի հետ զրույցում ասել է, որ բարդ իրավիճակ է հարավկովկասյան տարածաշրջանում, որտեղ արևմտյան երկրներն իրավիճակը սրելու բացահայտ փորձեր են ձեռնարկում։
Նրա խոսքով՝ Արևմուտքը ձգտում է ոչ միայն «սեպ խրել», այլև Հայաստանին հեռացնել դաշնակիցներից։
«Սա, բնականաբար, հստակ գիտակցում են բոլոր գործընկերները»,- ասել է Վասիլևը՝ շեշտելով, որ նման իրավիճակների օրինակներ տեսնում են նաև Վրաստանում։
«Մեզ չեն կարող չանհանգստացնել ու չմտահոգել Երևանում արտաքին խաղացողների և ղեկավարության գործողությունները, որոնք ապակայունացնում են իրավիճակը ոչ միայն Հայաստանի ներսում, այլև կարող են սրել իրավիճակը դրա սահմաններից դուրս», – ասել է Վասիլևը։
