Նյու Յորքի դատարանի երդվյալ ատենակալները Թրամփին մեղավոր են ճանաչել բոլոր 34 կետերով. նախկին նախագահն իրեն «քաղբանտարկյալ» է հայտարարել
Նյու Յորքի դատարանի երդվյալ ատենակալները հրապարակել են ԱՄՆ նախկին նախագահ Դոնալդ Թրամփի դեմ քրեական գործով մեղադրական դատավճիռը. նա մեղավոր է ճանաչվել մեղադրանքի բոլոր 34 կետերով, հայտնում է svoboda.org-ը:
Խոսքը 2016-ի նախագահական ընտրություններից առաջ նախկին պոռնոդերասանուհի Սթորմի Դենիելսին վճարված գումարները թաքցնելու նպատակով փաստաթղթղերը կեղծելու հարցով գործի մասին է:
Մեղադրական դատավճռի հիման վրա դատավճիռը կհրապարակվի ավելի ուշ։ Ակնկալվում է, որ դա տեղի կունենա հուլիսի 11-ին։ Այսպիսով, Թրամփը կարող էր դատապարտվել ընտրություններից առաջ։ Նրան կարող է սպառնալ տուգանք, պայմանական պատիժ կամ փաստացի ազատազրկում։ Սպասվում է, որ պաշտպանական կողմը կբողոքարկի վճիռը կայացնելուց հետո:
Թրամփը դատարանում պնդել է իր անմեղությունը:
Սա ԱՄՆ պատմության մեջ առաջին դեպքն է, երբ նախկին նախագահը մեղավոր է ճանաչվում քրեական հանցագործության համար:
Նշվում, է, որ ԱՄՆ նախկին նախագահը փաստաթղթերի կեղծման գործով երդվյալ ատենակալների մեղադրական դատավճռից հետո իրեն «քաղբանտարկյալ» է հայտարարել։
«Ես մեղավոր ճանաչվեցի կեղծված դատավարության արդյունքում, ես քաղբանտարկյալ եմ», – ասվում է Թրամփի նախընտրական կայքի գլխավոր էջում։
Նա նաև «խայտառակություն» է անվանել երդվյալ ատենակալների մեղավորության որոշումը և ասել, որ անմեղ է և «պայքարելու է մինչև վերջ»:
