Իրանի ԶՈւ Գլխավոր շտաբը նախնական հաշվետվություն է ներկայացրել նախագահ Ռայիսիի ուղղաթիռի վթարի պատճառների մասին
Իրանի զինված ուժերի Գլխավոր շտաբը հրապարակել է նախագահ Էբրահիմ Ռայիսիին տեղափոխող ուղղաթիռի վթարի հանգամանքներն ու պատճառները հետաքննող բարձրաստիճան հանձնախմբի նախնական հաշվետվությունը։ Այս մասին գրում է IRNA գործակալությունը:
Հաշվետվության մեջ ասված է, որ հավաքվել է տարբեր մասնագիտական, տեխնիկական և ընդհանուր բնագավառներում տեղեկատվության զգալի մասը, որը կարող է կապված լինել պատահարի պատճառների հետ:
Ըստ փաստաթղթի՝ որոշ գործողություններ վերջնական եզրակացության համար պահանջում են ավելի շատ ժամանակ․ դրանք գտնվում են քննության գործընթացում, իսկ որոշ հարցերի վերաբերյալ կարելի է վստահ հայտարարություններ անել, որոնք հետևյալն են.
Ուղղաթիռը շարունակել է հետևել նախապես պլանավորված երթուղուն և չի շեղվել դրանից մինչև դեպքից մոտավորապես մեկուկես րոպե առաջ։
Վթարային ուղղաթիռի օդաչուն կապի մեջ է եղել խմբի երկու մյուս ուղղաթիռների հետ։
Վթարային ուղղաթիռի բեկորներում փամփուշտի կամ նման այլ բաների հետքեր չեն հայտնաբերվել։
Վթարային ուղղաթիռը բռնկվել է բարձունքներին բախվելուց հետո:
Տեղանքի բարդության, մառախուղի և ցածր ջերմաստիճանի պատճառով որոնողական գործողությունը շարունակվել է մինչև գիշեր և գիշերը նույնպես շարունակվել է, իսկ երկուշաբթի օրվա (խմբ․՝ մարտի 20-ի) լուսադեմին (առավոտյան ժամը 5-ին) (իրանական) անօդաչու թռչող սարքերի օգնությամբ ճշգրիտ որոշվել է պատահարի վայրը, և ցամաքային ուժերը սկսել են որոնողական գործողությունն այդ շրջանում:
Ավիախմբի հետ կարգավարական աշտարակի խոսակցություններում նույնպես կասկածելի ոչինչ չի եղել։
Հրապարակման մեջ նշվում է, որ ուղղաթիռի վթարի հետ կապված փաստաթղթերի զգալի մասը հավաքվել է, և որոշ մանրամասնությունների և փաստաթղթերի ուսումնասիրման համար կպահանջվի ավելի շատ ժամանակ, որոնք մանրազնին վերլուծությունից և փորձաքննությունից հետո Իրանի ժողովրդին կհաղորդվեն հետագա հայտարարություններում:
Մայիսի 19-ին Իրանի նախագահ Էբրահիմ Ռայիսիի ուղղաթիռը վայրէջք կատարելիս կործանվել էր Իրանի Արևելյան Ատրպատական նահանգում, երբ նա երկրի արտգործնախարար Հոսեյն Ամիր Աբդոլլահիանի և այլ պաշտոնյաների հետ վերադառնում էր Իրանի և Ադրբեջանի Հանրապետության սահմանին գտնվող ջրամբարի բացման արարողությունից։ Կործանված ուղղաթիռում գտնվողներից ոչ ոք ողջ չի մնացել։
