Ուկրաինայի հարցում Շոլցի և Մակրոնի տարաձայնությունները վերաճում են բացահայտ թշնամանքի. Politico
Ամերիկյան Politico թերթը գրում է, որ Գերմանիայի կանցլեր Օլաֆ Շոլցի և Ֆրանսիայի նախագահ Էմանուել Մակրոնի միջև լուրջ տարաձայնություններ են առաջացել Ուկրաինային օգնելու հարցում։
«Շոլցի և Մակրոնի միջև տարաձայնությունները վերաճում են բացահայտ թշնամանքի»,- գրում է պարբերականը՝ մանրամասնելով, որ նրանք չեն կարողանում համաձայնության գալ զենքի մատակարարման հարցում։
Ըստ պարբերականի՝ Բեռլինը չի ցանկանում Կիևին փոխանցել «Taurus» հրթիռները, մինչդեռ Փարիզն ավելի վաղ պարտավորվել էր Ուկրաինային ուղարկել իր թևավոր SCALP հրթիռները:
Հակասության ևս մեկ պատճառ է դարձել Ռուսաստանի սահման զինվորներ ուղարկելու հարցը։ Օրինակ` Շոլցը բազմիցս հայտարարել է, որ ՆԱՏՕ-ն Ուկրաինայում հակամարտության կողմ չի դառնա, և գերմանացի զինծառայողներ Ուկրաինա չեն ուղարկվի։ Ֆրանսիայի առաջնորդն էլ հնարավոր է համարել արևմտյան զինվորների հնարավոր ուղարկումն Ուկրաինա, սակայն նրա այս գաղափարը քննադատության է արժանացել։
Շոլցը նաև դժգոհ է, որ Գերմանիան ավելի շատ օգնություն է ցուցաբերել Կիևին, քան Ֆրանսիան: Քիլի համաշխարհային տնտեսության ինստիտուտի տվյալներով՝ Գերմանիայի օգնությունը հատուկ գործողության ընթացքում հասել է 17,7 մլրդ եվրոյի, մինչդեռ Ֆրանսիան ընդամենը 635 մլն եվրո է հատկացրել։
