Ռուսաստանի Դաշնությունը Ղարաբաղում խաղաղապահների ներկայության պայմանները կքննարկի միայն Բաքվի հետ. Գալուզին
Մոսկվան առիթը բաց չի թողնում՝ նշելու համար, թե Արցախում տեղակայված ռուս խաղաղապահների տեղակայման հետ կապված հարցերը քննարկվում են Ադրբեջանի հետ։ Այս անգամ էլ ռուսական «ՏԱՍՍ»-ին տված իր հարցազրույցում թեմային անդրադարձել է ՌԴ փոխարտգործնախարար Միխայիլ Գալուզինը։
Նա նշել է, որ Ադրբեջանի հետ երկխոսությունը կառուցողական է։
Գալուզինը տեղեկացրել է, որ Մոսկվան Լեռնային Ղարաբաղում ռուս խաղաղապահների ներկայության պայմանները կքննարկի միայն Բաքվի հետ՝ կապված տարածաշրջանում իրավիճակի արմատական փոփոխության հետ։
«Հաշվի առնելով Ղարաբաղում իրավիճակի արմատական փոփոխությունը՝ մեր խաղաղապահների մնալու պայմանները քննարկվում են միայն ադրբեջանական կողմի հետ»,- հստակեցրել է նա։
Գալուզինի խոսքով՝ Ադրբեջանի հետ երկխոսությունը կառուցողական է, բոլոր առաջացող հարցերը լուծում են երկուստեք ընդունելի ձևով:
«Ինչ վերաբերում է 2025 թվականի նոյեմբերից հետո ռուսական խաղաղապահ կոնտինգենտի լիազորությունների երկարաձգմանը, ապա դա կախված կլինի տարածաշրջանում տիրող իրավիճակից, նրանց հետագա ներկայության պահանջից և Բաքվի հետ համապատասխան պայմանավորվածություններից»,- հավելել է փոխնախարարը։
2023 թվականի սեպտեմբերի 19-ին Լեռնային Ղարաբաղում հերթական էսկալացիան սկսվեց. Բաքվում հայտարարվել է ռազմական գործողության մեկնարկի մասին։ Երևանը տեղի ունեցողն անվանել է «լայնածավալ ագրեսիա». Ռուսաստանը հակամարտության կողմերին կոչ է արել դադարեցնել արյունահեղությունը և վերադառնալ դիվանագիտական կարգավորմանը։
Սեպտեմբերի 20-ին պայմանավորվածություն է ձեռք բերվել դադարեցնել ռազմական գործողությունները, իսկ հաջորդ օրն Ադրբեջանի Եվլախ քաղաքում կայացել է Բաքվի և Ղարաբաղի հայ բնակչության ներկայացուցիչների հանդիպումը՝ «վերաինտեգրման հարցերը քննարկելու համար»։
