ԱՄՆ-ն հայտնել է Եմենում հութիների ԱԹՍ-ների ոչնչացման մասին
ԱՄՆ զինված ուժերի Կենտրոնական հրամանատարության (CENTCOM) ուժերը հարվածներ են հասցրել Եմենի «Անսար Ալլահ» շարժման հութիների օբյեկտներից մեկին՝ ոչնչացնելով 10 անօդաչու թռչող սարք։
«Փետրվարի 1-ին Սանայի ժամանակով ժամը 01:30-ի սահմաններում Կենտրոնական հրամանատարության ուժերը հարվածներ են հասցրել կառավարման ցամաքային կայանի և 10 կամիկաձե անօդաչու թռչող սարքերի, որոնք պատկանում էին Իրանի կողմից օժանդակություն ստացող հութիներին», – ասված է հաղորդագրության մեջ:
Հրամանատարությունը պնդում է, որ կայանը և ԱԹՍ-ներն «անմիջական սպառնալիք էին ներկայացնում տարածաշրջանում առևտրային նավերի և ԱՄՆ ռազմանավերի համար», ուստի որոշում է կայացվել ոչնչացնել դրանք։
ԱՄՆ-ն և Մեծ Բրիտանիան մի քանի անգամ հարվածներ են հասցրել Եմենում հութիների օբյեկտներին, սակայն հութիները շարունակում են Կարմիր ծովում և Ադենի ծոցում առևտրային նավերի վրա հարձակումները՝ հայտնելով, որ դրանք կդադարեն միայն այն ժամանակ, երբ Իսրայելը դադարեցնի ռազմական գործողությունները Գազայի հատվածում։
