Թուրքական Շըրնաք նահանգում ֆուտբոլային խաղի ժամանակ կոտրել են մրցավարի քիթը

Թուրքիայի հարավ-արևելքում գտնվող Շըրնաք նահանգում ֆուտբոլային խաղի ժամանակ կոտրել են մրցավարի քիթը։ Այս մասին գրում է ermenihaber-ը:

Միջադեպը տեղի է ունեցել սիրողական լիգայի առաջին խմբի «Քումչաթըսպոր-ՋիզրեԴիջլեսպոր» խաղից հետո։ Թուրքական ակումբի ղկավարությունը խիստ դժգոհ է եղել խաղի մրցավարությունից։

Թուրքիայի ֆուտբոլի ֆեդերացիայի կարգապահական խորհուրդը ուսումնասիրում է դեպքի մանրամասները։

Նշվում է, որ վերջին շրջանում սա 2-րդ նմանատիպ դեպքն է։ Նախորդ միջադեպը տեղի էր ունեցել մայրաքաղաք Անկարայում։ Թուրքիայի Սուպերլիգայի մրցաշարի շրջանակներում թուրքական «Անքարագյուջուն» ընդունել էր «Ռիզեսփորին»։ Հանդիպման ավարտին՝ 97-րդ րոպեին, «Ռիզեսփորը» գոլ է խփել և հավասարեցրել հաշիվը։ Հանդիպումն ավարտվել է 1։1 հաշվով։ Եզրափակիչ սուլիչից անմիջապես հետո Անկարայի ֆուտբոլային ակումբի նախագահ Ֆարուք Քոչան դաշտ է մտել և հարվածել մրցավար Հալիլ Ումուտ Մելերի դեմքին։

Ակումբի նախագահի հետ դաշտ մտած ևս երկու հոգի, ինչպես նաև երկրպագուներ սկսել էին ոտքերով հարվածել գետնին ընկած մրցավարին։