Պուտինի բազմազավակության կոչը՝ թուրքական ԶԼՄ-ների ուշադրության կենտրոնում
Թուրքական լրատվամիջոցների ուշադրության կենտրոնում է հայտնվել բնակչությանն ուղղված ՌԴ նախագահ Վլադիմիր Պուտինի՝ բազմազավակության վերաբերյալ կոչը։ Այս մասին տեղեկացնում է ermenihaber.am-ը։
«Մեր երկրում ապրող ազգերից շատերը, փառք Աստծո, պահպանում են ամուր ընտանիքի ավանդույթը, որտեղ մեծանում են չորս, հինգ և ավելի երեխաներ։ Հիշենք, որ մեր տատիկներից շատերը յոթ-ութ երեխա են ունեցել։ Պահպանենք ու վերակենդանացնենք այս հրաշալի ավանդույթները։ Շատ երեխաներ և մեծ ընտանիք ունենալը պետք է դառնա նորմալ երևույթ, ապրելակերպ Ռուսաստանի բոլոր ժողովուրդների համար»,- նշել է Պուտինը։
Պուտինը ընդգծել է, որ ընտանիքը ոչ միայն պետության և հասարակության հիմքն է, այլև «բարոյականության աղբյուրը»։
«Ռուսաստանի ժողովրդի փրկությունն ու մեծացումը մեր խնդիրն է առաջիկա տասնամյակների համար։ Կասեմ ավելին. սա ռուսական աշխարհի, հավերժական Ռուսաստանի ապագան է», նշել է նա։
Թուրքական ԶԼՄ-ների ուշադրությունը գրավել է Պուտինի խոսքերի այն հատվածը, որտեղ նա նշել է, որ ընտանիքում 3-4 երեխայի առկայությունն անգամ դեռ չի համարվում բազմազավակություն։
Ուշագրավ է, որ «T24» թուրքական լրատվամիջոցի սյունակագիր Հասան Աքսայի դիտարկմամբ՝ վերջին տարիներին Ռուսաստանի ամենագլխավոր խնդիրներից մեկը դեմոգրաֆիական անմխիթար պատկերն է։
