Պենտագոնում հայտնել են Կարմիր ծովում, ենթադրաբար, դեպի Իսրայել արձակված հրթիռների և ԱԹՍ-ների խոցման մասին
ԱՄՆ պաշտպանական գերատեսչությունը հայտնել է, որ երկրի ռազմածովային ուժերի ռազմանավը Կարմիր ծովում կալանել է 3 թևավոր հրթիռներ և մի քանի անօդաչու թռչող սարքեր, որոնք արձակվել էին Եմենում գործող Հութի խմբավորման կողմից, ենթադրաբար, Իսրայելի ուղղությամբ։
Պենտագոնի խոսնակ Պատրիկ Ռայդերը լրագրողներին հայտնել է, որ հրթիռները և ԱԹՍ-ները խոցվել են Կարմիր ծովում տեղակայված ամերիկյան ռազմածովային ուժերի «Քարնի» կործանիչ ռազմանավի անձնակազմի կողմից։ Միջադեպի հետևանքով տուժածներ չկան։
«Մենք հստակ չենք կարող ասել, թե որն էր այս հրթիռների և անօդաչուների թիրախը, բայց դրանք արձակվել էին Եմենից՝ Կարմիր ծովով դեպի հյուսիս, հնարավոր է՝ Իսրայելում թիրախների ուղղությամբ», – ասել է Ռայդերը։
Իր հերթին Reuters-ը, հղում անելով ԱՄՆ պաշտոնատար աղբյուրի, նշում է, որ հարվածների թիրախը ամերիկյան ռազմանավը չէր։
Հոկտեմբերի 7-ին պաղեստինյան ՀԱՄԱՍ արմատական շարժման կողմից Իսրայելի վրա հարձակումից հետո Միացյալ Նահանգներն ուժեղացրել է իր ռազմական ներկայությունը Մերձավոր Արևելքում՝ Միջերկրական ծով ուղարկելով երկու ավիակիր, դրանց աջակցող նավեր, ինչպես նաև շուրջ 2000 ծովային հետևակի զինվորների։
