Այս պահին բերման ենթարկվածների թվի վերաբեյալ ոստիկանությունը դեռևս թարմ տվյալներ չունի. բոլորն էլ երեք ժամ հետո ազատ են արձակվում. ոստիկանություն
Այսօր վաղ առավոտից Երևանում վերսկսվել են բողոքի և անհնազանդության ակցիաները, որոնք, արդեն երեք օր է՝ տեղի են ունենում Երևանում։
Այսօր բողոքի ակցիայի ընթացքում ժամը 13։00-ի դրությամբ բերման է ենթարկվել 84 մարդ։ 168.am–ին այս մասին հայտնեց ոստիկանության հասարակայնության հետ կապի և լրատվության վարչության պետ Զարզանդ Գաբրիելյանը։
Հարցին՝ իսկ այս պահի դրությամբ չկա՞ տվյալ, թե քանի՞ հոգի է բերման ենթարկվել, Զարզանդ Գաբրիելյանը պատասխնեց, որ դեռևս թարմ տվյալներ չունեն։
Հաջորդ հարցին՝ ժամը 13։00-ի դրությամբ քանի՞ մարդ է ազատ արձակվել, մեր զրուցակիցը պատասխանեց, որ բոլորն էլ երեք ժամ հետո ազատ են արձակվում։
Հիշեցնենք, որ սեպտեմբերի 19-ին, ժամը 13։00-ին Ադրբեջանը Արցախի Հանրապետության դեմ սկսել է լայնածաված ռազմական գործողություններ, որոնք դադարեցվել են սեպտեմբերի 20-ին։ Ռազմական գործողությունների արդյունքում հազարավոր խաղաղ բնակիչներ զրկվել են իրենց տներից, նրանց շրջանում կան բազմաթիվ զոհեր, այդ թվում՝ երեխաներ, վիրավորներ, անհետ կորածներ։
