Յոհաննեսբուրգի բնակելի շենքում բռնկված հրդեհի զոհերի թիվը հասել է 73-ի
Յոհաննեսբուրգի կենտրոնում հինգհարկանի բնակելի շենքում բռնկված հրդեհի զոհերի թիվը հասել է 73-ի: Այս մասին տեղեկանում ենք հարավաֆրիկյան News 24 պարբերականից։
Հարավաֆրիկյան Հանրապետության արտակարգ իրավիճակների քաղաքային ծառայության ներկայացուցիչ Ռոբերտ Մուլաուձին հայտնել է, որ վիրավորների թիվը հասել է առնվազն 52-ի։ Նա նշել է, որ զոհերի թիվը դեռ կարող է աճել․ փախչել փորձող մարդիկ հայտնվել են ծուղակում, քանի որ հարկերի միջև տարբեր կառույցներ են եղել։
Ավելի վաղ հաղորդվում էր 63 զոհի մասին։
Վաղ առավոտյան բռնկված հրդեհի պատճառն առայժմ մնում է անհայտ։
Տեղական SABC ռադիոկայանը հայտնում է, որ շենքում բնակվում էին մարդիկ, որոնք անօրինական կերպով են գրավել այն, այդ թվում՝ անօրինական միգրանտներ:
