Կանադայում անտառային հրդեհների պատճառով զանգվածային տարհանումներ են սկսվել
Կանադայի Հյուսիսարևմտյան տարածքների կենտրոն Յելոունայֆ քաղաքի արվարձաններում անտառային հրդեհների պատճառով հազարավոր մարդկանց են տարհանել։ Այս մասին հաղորդում է BBC-ն։
Հարյուրավոր մարդիկ հավաքվել են քաղաքի օդանավակայանում, որպեսզի տարհանվեն ռազմական ինքնաթիռներով։ Յելոունայֆի 20 հազար բնակիչներին տարհանվելու ժամանակ է տրվել մինչև տեղի ժամանակով օգոստոսի 18-ի կեսօր։ Օգոստոսի 17-ի դրությամբ կրակը քաղաքից ընդամենը 16 կմ հեռավորության վրա է գտնվել։
Հյուսիսարևմտյան տարածքներում գրեթե 240 անտառային հրդեհ է մոլեգնում, հայտարարվել է արտակարգ դրության ռեժիմ։
Օրերս համացանցում տեսանյութ էր տարածվել, որտեղ երևում է, թե ինչպես է Հյուսիսարևմտյան տարածքների Ֆորթ Սմիթ քաղաքում երկինքը բոսարագույն դարձել հրդեհների պատճառով։
