Թուրք սակրավորները ոչնչացրել են Ստամբուլի մերձակայքում ծովում հայտնաբերված հրետանային արկերը
Թուրքիայի ռազմածովային ուժերի սակրավորներն ավարտել են Ստամբուլի մերձակայքում սևծովյան Շիլե բնակավայրի լողափնյա գոտու ստուգումը, որի մոտ անցած շաբաթվա վերջին հայտնաբերվել է մոտ 30 հրետանային արկ։ Ինչպես տեղեկանում ենք ТАСС գործակալությունից, ռազմամթերքը ոչնչացվել է։
Հուլիսի 31-ից Շիլեի լողափերը փակ են, սակրավորները զննել են ափը և այն շրջանը, որտեղ հայտնաբերվել են արկերը, լողափի գոտու մոտ գտնվող տների բնակիչների անվտանգության համար նրանց տարհանել են։
Հուլիսի 30-ի առավոտյան ռազմածովային ուժերի ջրասուզակները Սոֆուլարի շրջանում սուզվելու ժամանակ 28 արկ են հայտնաբերել Սև ծովի հատակին։
Շիլեի դատախազի կարգադրությամբ ութ ռազմամթերք հենց նույն օրը տարվել է տեղի զորամաս, մնացածը սակրավորները ոչնչացրել են օգոստոսի 2-ին՝ դրա համար օգտագործելով ավելի քան 30 կգ պայթանյութ։
Դատախազությունը հետաքննություն է անցկացնում արկերի հայտնաբերման կապակցությամբ։ Հետաքննության տվյալներով՝ դրանք հնացած հրետանային ռազմամթերք են և ոչ մի առնչություն չունեն Սև ծովում ուկրաինական լողացող ականների հետ։ Թուրքիայի ռազմածովային ուժերը բազմիցս նման ականներ են ոչնչացրել երկրի ափերի մոտ:
