ԵԱՏՄ մաքսավորները կարգավորել են հայտարարագրման և մաքսային հսկողության մոտեցումները
Բելառուսի Վիտեբսկի մարզում Եվրասիական տնտեսական միության (ԵԱՏՄ) անդամ պետությունների Մաքսային ծառայությունների միացյալ կոլեգիայի նիստի մասնակիցները հաստատել են մաքսային հայտարարագրման և վերահսկման ընդհանուր մոտեցումները։ Ինչպես տեղեկանում ենք ТАСС գործակալությունից, այդ մասին հաղորդել է Բելառուսի պետական մաքսային կոմիտեի մամուլի ծառայությունը՝ ամփոփելով նիստի արդյունքները։
«Միջոցառմանը համաձայնեցվել են 20 հարցերի շուրջ գործողությունները, որոնք օրակարգ էին մտցրել բոլոր մաքսային ծառայությունները: Կանոնավորվել են միասնական մոտեցումները, որոնք վերաբերում են մաքսային հայտարարագրմանը և մաքսային հսկողության իրականացմանը, մաքսային հայտարարագրերի լրացմանը, ապրանքների դասակարգմանը, էլեկտրոնային փաստաթղթաշրջանառությանը», – ասված է հաղորդագրության մեջ։
Նիստի ընթացքում առանձին ուշադրություն է նվիրվել էլեկտրոնային նավիգացիոն կապարակնիքների կիրառմանը, որոնք հաջորդ տարվանից կօգտագործվեն ԵԱՏՄ-ի ամբողջ տարածքում։
Ռուսաստանի Դաշնային մաքսային ծառայության ղեկավարի պաշտոնակատար Ռուսլան Դավիդովն ընդգծել է, որ «ԵԱՏՄ-ն ունի միասնական մաքսային տարածք, և չկան ներքին մաքսային սահմաններ»։
«Ուստի, որպեսզի բոլոր երկրները տնտեսական տեսանկյունից հավասարապես զարգանան, պետք է ապահովվի միասնական մաքսային վարչարարություն բոլոր սահմաններին», – ասել է նա։
Կոլեգիայի նիստին, Բելառուսի և Ռուսաստանի Դաշնության ներկայացուցիչներից բացի, մասնակցել են Հայաստանի, Ղազախստանի և Ղրղզստանի պատվիրակությունները, ինչպես նաև Եվրասիական տնտեսական հանձնաժողովի քարտուղարության և Մաքսային օրենսդրության վարչության ղեկավարությունը:
