Մահացել է ռուս վերլուծաբան Ալեքսանդր Սկակովը
Հունիսի 28-ին, երկարատև ծանր հիվանդությունից հետո, մահացել է ռուս քաղաքագետ, Կովկասի մասնագետ, պատմական գիտությունների թեկնածու, Հետխորհրդային հետազոտությունների կենտրոնի կովկասյան սեկտորի առաջատար գիտաշխատող Ալեքսանդր Յուրևիչ Սկակովը։
Նա հեղինակել է բազմաթիվ գրքեր, 200-ից ավելի գիտական հոդվածներ և 100-ից ավելի հոդվածներ Կովկասի նորագույն պատմության վերաբերյալ:
Ալեքսանդր Սկակովն աշխատանքի բերումով հաճախ էր լինում տարածաշրջանում և հատկապես՝ Հայաստանում, հանդիպում հայաստանյան փորձագիտական ու լրագրողական համայնքի ներկայացուցիչների հետ, տալիս հարցազրույցներ, իր կանխատեսումները, վերլուծությունները հնչեցնում հայ-ռուսական, հայ-թուրքական, Արցախյան հիմնահարցի վերաբերյալ։
Սկակովը նաև լավ ծանոթ էր հայաստանյան ներքաղաքական կյանքին, քաղաքական առանցքային դեմքերին ու նրանց մոտեցումներին։
168․am-ը ևս հաճախակի էր դիմում նրան ռեգիոնալ իրադարձությունների վերաբերյալ հարցազրույցի կամ մեկնաբանության խնդրանքով։
168․am-ի խմբագրակազմը ցավակցում է ռուս փորձագետ Ալեքսանդր Սկակովի ընտանիքին ու հարազատներին` վերլուծաբանի անժամանակ մահվան կապակցությամբ։
