Դամասկոսի ոստիկանական տեղամասերից մեկի մերձակայքում ավտոմեքենա է պայթել
Դամասկոսի հյուսիսում այսօր հզոր պայթյուն է որոտացել։ Ինչպես հաղորդել է Sham ռադիոկայանը, պայթել է Մասակին-Բերզի շրջանի ոստիկանական տեղամասի մերձակայքում կայանված ավտոմեքենայում տեղակայված ռումբը: Այդ մասին տեղեկանում ենք ТАСС գործակալությունից:
Սիրիայի ՆԳ նախարարության ներկայացուցիչը Al Ekhbariya հեռուստաալիքին հայտնել է, որ պայթյունի հետևանքով վիրավորվել է հինգ ոստիկան։ Պայթեցված ավտոմեքենան այրվել է:
«Պայթանյութը գործի է դրվել, երբ մեքենան մուտք է գործել Մասակին-Բերզի շրջանի ոստիկանական տեղամասի բակ, – հստակեցրել է նա: – Արդյունքում հինգ աշխատակից, այդ թվում՝ մեկ սպա, տարբեր ծանրության վնասվածքներ են ստացել»:
Դամասկոսում վերջին ահաբեկչությունն իրականացվել է ապրիլի 2-ին, երբ մայրաքաղաքի արևմուտքում գտնվող Մեզզա պողոտայում ականապատ մեքենա էր պայթել։ Զոհերի և վիրավորների մասին չի հաղորդվել:
2021 թ. հոկտեմբերի 20-ին Դամասկոսի կենտրոնում՝ Բարադա գետի ափին գտնվող կամրջի մոտ պայթեցվել էր զինվորականներ տեղափոխող ավտոբուս, ինչի հետևանքով զոհվել էր 14 մարդ, տասնյակ մարդիկ վիրավորվել էին։
