31-ամյա երիտասարդը հայհոյանքներ է հնչեցրել, փորձել է գործադրել նռնականման առարկա
Մարտի 18-ի երեկոյան ոստիկանության Նոյեմբերյանի բաժնի քրեական հետախույզները ստացել էին տեղեկություն, որ ժամը 15-ից 16-ն ընկած ժամանակահատվածում Նոյեմբերյանի բենզալցակայաններից մեկի տարածքում 31-ամյա մի երիտասարդ, կոպտորեն խախտելով հասարակական կարգը, հայհոյանքներ է հնչեցրել դեռ չպարզված անձանց հասցեին, փորձել է գործադրել նռնականման առարկա, ինչը կանխել են ներկաները:
Նոյեմբերյանի ոստիկանները ձեռնարկել են միջոցառումներ՝ դեպքի հանգամանքները, ականատես անձանց շրջանակը պարզելու և երիտասարդին հայտնաբերելու ուղղությամբ:
Բացատրական աշխատանքի արդյունքում մարտի 20-ին երիտասարդը դիմում-մեղայականով ներկայացել է ոստիկանության Նոյեմբերյանի բաժին: Նա նաև ներկայացրել է «Ֆ-1» տիպի նռնակ՝ պայթուցիչով, որը փորձել էր գործադրել վերոհիշյալ միջադեպի ժամանակ:
Երիտասարդը ներկայացվել է Նոյեմբերյանի քննչական բաժին: Հանգամանքները պարզվում են:
