Ծանրամարտի Եվրոպայի առաջնությունը Երևանում անցկացնելը բացառիկ իրադարձություն է․ Արայիկ Հարությունյան
Հայաստանի Հանրապետության վարչապետի աշխատակազմի ղեկավար, ծանրամարտի Եվրոպայի 2023թ․ առաջնության անցկացման աշխատանքների
նախապատրաստման և կազմակերպման միջգերատեսչական հանձնաժողովի նախագահ Արայիկ Հարությունյանը ծանրամարտի Եվրոպայի առաջնությունը Երևանում անցկացնելը համարում է 2023 թվականի բացառիկ իրադարձություն:
«2023 թվականին ամենակարևոր հանրային իրադարձություններից մեկը լինելու է ծանրամարտի Եվրոպայի առաջնությունը: Մարտի 17-ին Հյուսիսային պողոտայում կտեղադրվի առաջնության հետհաշվարկի ժամացույցը: Եվրոպայի առաջնությունը վարկանիշային է Օլիմպիական խաղերի համար, ինչը մեծացնում է հետաքրքրությունը այս մրցաշարի նկատմամբ: Հայաստան են գալու Եվրոպայի ամենաուժեղ մարզիկները»,- լրագրողների հետ հանդիպման ժամանակ ասաց Հարությունյանը:
Նրա խոսքով` նմանատիպ մրցաշարերը բարձրացնում են Հայաստանի վարկը սպորտային աշխարհում և ոչ միայն: «Նմանատիպ մրցաշարեր ընդունելու հայտերը ներկայացնելիս՝ մենք ֆեդերացիաներին ասում ենք, որ անելու ենք առավելագույնը և նոր նշաձող ենք սահմանելու: Դա արել ենք նախորդ տարի` բռնցքամարտի Եվրոպայի առաջնության դեպքում»,-ասաց նա:
ՀՀ վարչապետի աշխատակազմի ղեկավարը Արայիկ Հարությունյանն առանձնացրեց, որ Եվրոպայի առաջնությունը հյուրընկալելով՝ Հայաստանը ներկայանում է ոչ միայն որպես մարզական կենտրոն, այլ նաև մշակութային երկիր:
Ծանրամարտի Եվրոպայի առաջնությունը կկայանա Երևանի Կարեն Դեմիրճյանի անվան մարզահամերգային համալիրում ապրիլի 15-23-ը: Անկախ Հայաստանի պատմության մեջ առաջին անգամն է, որ Երևանն ընդունում նման խոշորամասշտաբ մրցաշար: Ծանրամարտի ԵԱ-ն վարկանիշային է Փարիզի 2024 թվականի 33-րդ ամառային Օլիմպիական խաղերի համար: Առաջնությանը կմասնակցեն մոտ 40 երկրի 500-ից ավել մարզիկներ: Ընդհանուր պատվիրակությունների թիվը կգերազանցի 1000-ը: Առաջնության բացման պաշտոնական արարողությունը կկայանա ապրիլի 14-ին: Տոմսերը մոտավոր կարժենան 1000-10.000 դրամ:
