Վրաստանի խորհրդարանը մարտի 9-ին և 10-ին աշխատելու Է սահմանափակ ռեժիմով
«Վրաստանի խորհրդարանը մարտի 9-ին և 10-ին աշխատելու Է սահմանափակ ռեժիմով, քանի որ շենքը վնասվել է մարտի 7-ին և 8-ին օտարերկրյա գործակալների մասին օրինագծի ընդունման դեմ բողոքի ակցիաների ժամանակ»,- հաղորդել Է խորհրդարանի աշխատակազմը։
Այդ մասին տեղեկանում ենք «Ինտերֆաքս» գործակալությունից: Խորհրդարանի տարածք մուտքը սահմանափակվելու է խոսնակի հրամանով, որպեսզի այնտեղ հնարավոր լինի պարզել եւ փոխհատուցել հասցված վնասը։ Մուտքը կսահմանափակվի բոլոր այցելուների, պատգամավորների և լիազորված լրատվամիջոցների աշխատակիցների համար։ «Ենթակառուցվածքների վնասվելու և շենքում գտնվող մարդկանց առողջության համար հնարավոր վտանգներից խուսափելու կապակցությամբ խորհրդարանի լիագումար նիստերն այս շաբաթ չեն անցկացվելու»,-ասվում է հայտարարության մեջ:
Վրաստանի ՆԳՆ-ում հայտնել են, որ վերջին երկու օրվա ընթացքում արմատականորեն տրամադրված մի խումբ քաղաքացիներ փորձել են ներխուժել խորհրդարանի շենք, վնասել են երկաթե ցանկապատերը եւ պատուհանների ճաղավանդակները, դռները, ինչպես նաև հրկիզիչ խառնուրդով շշեր են նետել շենքի ներս։
Շրջվել է ոստիկանական մեքենա: Ցուցարարների դեմ կիրառվել են ջրցան մեքենաներ և արցունքաբեր գազ։ Ձերբակալվել են 133 կարգազանցներ: Երկու օր տևած բողոքի ակցիաներից հետո իշխող «Վրացական երազանք» կուսակցությունը եւ խորհրդարանական մեծամասնությունը որոշել Է խորհրդարանից հետ կանչել օտարերկրյա գործակալների մասին օրինագիծը, որն առաջին ընթերցմամբ ընդունվել Է մարտի 7-ին։
Քաղաքական գործիչները խոստացել են լայն արշավ սկսել այս օրենքի ընդունման անհրաժեշտությունը պարզաբանելու ուղղությամբ, ինչպես նաև վստահեցրել են, որ Վրաստանը կպահպանի խաղաղությունն ու կայունությունը և կշարունակի դեպի Եվրոպա «արժանի ուղին»: Մարտի 8-ին ԵՄ-ի արտաքին գործերի գերագույն ներկայացուցիչ Ժոզեպ Բորելը հայտարարել է, որ Վրաստանում օտարերկրյա գործակալների մասին օրենքը հակասում է ԵՄ-ին անդամակցելու երկրի նպատակին։ Բորելի խոսքով՝ օրենքի վերջնական ընդունումը «կարող է լուրջ հետևանքներ ունենալ» ԵՄ-Վրաստան հարաբերությունների վրա։
