Արթուր Դավթյանն արդեն հաղթողի հոգեբանություն ունի. Հակոբ Սերոբյան
Հայաստանի մարմնամարզության հավաքականի գլխավոր մարզիչ Հակոբ Սերոբյանի կարծիքով հավաքականի առաջատար Արթուր Դավթյանն արդեն հաղթողի հոգեբանություն ունի:
«Նախորդ տարվա համեմատ՝ այս տարի Դոհայում կայացած աշխարհի գավաթի խաղարկությանը մենք ուժեղ մրցակցություն տեսանք: Աշխարհի գավաթի խաղարկություններին մասնակցում էին բոլոր ուժեղագույնները: Մեծ մրցակցություն կար օղակների, նժույգ-թափերի և հենացատկի վարժություններում: Արթուրը իր մեդալներով արդարացրեց իրեն: Արթուր Դավթյանն արդեն հաղթողի հոգեբանություն ունի: Նա 90 տոկոսով լուծել է այս տարի ևս աշխարհի բացարձակ գավաթակիր դառնալու խնդիրը: Տեսնեն՝ ինչ կլինի Կահիրեի խաղարկությունում»,-լրագրողների հետ հանդիպման ժամանակ ասաց մասնագետը:
Սերոբյանի խոսքով` իր համար անակնկալ էր Գերմանիայում կայացած գավաթի փուլում Գագիկ Խաչիկյանի և Արթուր Ավետիսյանի արդյունքները, բայց երիտասարդները լավ աշխատանք կատարեցին «Իսկ ինչ կապված է Հարություն Մերդինյանի հետ, ապա նա արեց ավելին, քան կարող էր անել նրա տարիքի մարզիկը: Հարությունը նաև ձեռքի հետ կապված խնդիր ունի»,-ասաց նա:
Գլխավոր մարզիչը շեշտեց, որ ֆեդերացիայի հովանավորի շնորհիվ Եվրոպայի առաջիկա առաջնությունում թիմը մերսման մասնագետ է ունենալու:
Հավաքականը հաջորդիվ կնախապատրաստվի Եվրոպայի առաջնությանն ու աշխարհի գավաթի խաղարկության վերջին փուլին:
Հայաստանի մարմնամարզության թիմը Գերմանիայում և Կատարում կայացած աշխարհի գավաթի խաղարկությունների երկու փուլերում ընդհանուր առմամբ 4 մեդալ նվաճեց: Արթուր Դավթյանը երկու ոսկե մեդալ նվաճեց հենացատկում, Գագիկ Խաչիկյանը դարձավ Կոտբուսի գավաթի նժույգ-թափերի վարժության արծաթե, իսկ Արթուր Ավետիսյանը՝ օղակների բրոնզե մեդալակիր:
