ՄԱԳԱՏԷ-ի ղեկավարը ծրագրում է մարտի 4-ին Թեհրանում հանդիպել Իրանի նախագահի հետ
Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսին ծրագրում է մարտի 4-ին Թեհրան կատարած այցի ընթացքում հանդիպել Իրանի նախագահ Էբրահիմ Ռայիսիի հետ՝ քննարկելու իրանական միջուկային գործարքի շուրջ «երկխոսության վերսկսումը»։
Հեռուստաալիքի դիվանագիտական աղբյուրի տեղեկատվությամբ՝ Գրոսին հստակ ասել է, որ Թեհրան կայցելի միայն այն պայմանով, եթե խոսի Ռայիսիի հետ։ Համագործակցության վատթարացման ֆոնին ՄԱԳԱՏԷ-ի ղեկավարը «ցանկանում է հնարավորություն ունենալ վերսկսելու հարաբերություններն ամենաբարձր մակարդակով»։ Հանդիպումը նախատեսված է առավոտյան, իսկ երեկոյան ՄԱԳԱՏԷ-ի ղեկավարը կվերադառնա Վիեննա, նշել է աղբյուրը։ Իրանի Fars լրատվական գործակալությունը մարտի 1-ին հայտնել էր, որ Գրոսին Թեհրան կժամանի մարտի 3-ի երեկոյան։ Գործակալությունը նշել է, որ Գրոսին «կհանդիպի» Իսլամական Հանրապետության «պաշտոնատար անձանց հետ» և կքննարկի «տարբեր հարցեր»:
2015 թ.-ին կնքված միջուկային գործարքին վերադառնալու շուրջ բանակցությունները փակուղի են մտել 2022 թ.-ի ամռանից: ՄԱԳԱՏԷ-ն Ֆորդոյի միջուկային օբյեկտում մինչև 83,7% հարստացված ուրանի մասնիկներ է հայտնաբերել: Այս պահին քննարկումներ են ընթանում՝ որոշելու՝ արդյոք Թեհրանն ուրանի հարստացման այս շեմին հասել է պատահաբար թե միտումնավոր:
